Özbəkistanla Azərbaycanın ticari-iqtisadi əlaqələrinin böyük potensialı mövcuddur - Ekspert
Bakı, 23 avqust, AZƏRTAC
Özbəkistanla Azərbaycanın ticari-iqtisadi əlaqələrinin böyük potensialı mövcuddur. Ölkə başçılarının son illərdəki görüş intensivliyinə baxdıqda görürük ki, həm ölkə başçısı səviyyəsində, həm də nazirlər səviyyəsində dəfələrlə ikitərəfli və çoxtərəfli görüşlər keçirilib. Təbii ki, bu səfərlər ancaq iki qardaş ölkə arasında olan mədəni-tarixi yaxınlığı nümayiş etdirmək məqsədi güdmür. Həmçinin strateji siyasi yaxınlığı iqtisadi və ticari müstəvidə genişləndirmək məqsədi daşıyır.
Bu fikirləri AZƏRTAC-a açıqlamasında iqtisadçı ekspert Xalid Kərimli söyləyib.
Ekspert vurğulayıb ki, Özbəkistanla Azərbaycan arasındakı mövcud ticarətin həcmi ölkələrin potensiallarından çox aşağıdır: “Buna görə də ölkələr arasında ticarət, birgə müəssisələrin yaradılması, tranzit və logistik əlaqələrin yaxşılaşdırılması, birbaşa investisiyaların təmin edilməsi və qarşılıqlı olaraq bizneslərinin digər ölkədə investisiya qoyması üçün əlverişli şəraitin yaradılması istiqamətində addımlar atılır.
Azərbaycanın bir çox sahələrdə böyük təcrübəsi var ki, enerji də bu sahələrdən biridir. Ölkəmiz həm neft-qaz sahəsində, həm də intensiv surətdə alternativ enerji sahəsində bacarıqlarını inkişaf etdirir. Bu sahədə Azərbaycan Özbəkistanın enerji sektorunda investisiyalar yatıra və enerji sektorunun müasirləşməsində iştirak edə bilər. Özbəkistanın da öz növbəsində bir çox sahədə - yüngül sənayedə, maşınqayırma sənayesində uğurlu təcrübələri var. Bu da imkan verir ki, Azərbaycanla Özbəkistanın birgə şirkətlərinin və müəssisələrinin korporasiya şəklində fəaliyyəti təmin edilsin. Hətta bu işlərin layihələndirilməsi, birbaşa hər iki ölkənin maraqlarına uyğun və ticari-iqtisadi əlaqələrinin genişlənməsinə fayda verən layihələrin maliyyələşdirilməsi üçün Fond da yaradılıb”.
X.Kərimli bildirib ki, Özbəkistanla son 10 ildə əlaqələr sürətlə inkişaf edir, ölkəyə ciddi surətdə investisiyalar qoyulur və Mərkəzi Asiyanın ən böyük bazarlarından biri sayılır. Buna görə də, qeyri-neft sektorunun inkişafı və investisiyalar, eyni zamanda, əks idxal münasibətləri baxımından Özbəkistan Azərbaycan üçün maraqlıdır.
Bölmənin digər xəbərləri
