POLAD BÜLBÜLOĞLU “RTR PLANETA” TELEKANALINDA
AZƏRTAC xəbər verir ki, “RTR Planeta” telekanalında tanınmış artistlərin, elm və mədəniyyət xadimlərinin və siyasətçilərin dəvət olunduqları “Ömür xətti” verilişində tamaşaçılar həmvətənimiz, tanınmış müğənni və bəstəkar, Azərbaycanın xalq artisti, hazırda ölkəmizin Rusiya Federasiyasındakı səfiri Polad Bülbüloğlu ilə yenidən görüşmüşlər. Polad Bülbüloğlu atası - məşhur opera müğənnisi Bülbüldən, Bakı Konservatoriyasında dahi bəstəkar Qara Qarayevin sinfində təhsil aldığı illərdən, özünün keçmiş konsert fəaliyyətindən, Sovet İttifaqının şəhərlərinə qastrol səfərlərindən, respublikamız üçün çox mürəkkəb - müstəqilliyin təşəkkül tapdığı bir dövrdə mədəniyyət naziri kimi məsul vəzifədə çalışmasından söhbət açmışdır. O, royalda özünü müşayiət edərək, Azərbaycan folkloru – bayatı mövzusunda, habelə tanınmış şairlər İlya Reznik, Onegin Hacıqasımov və Rəsul Həmzətovun şeirlərinə yazdığı mahnıları ifa etmiş, tamaşaçıların suallarına cavab vermiş, gələcək yaradıcılıq planlarından danışmışdır.
Polad Bülbüloğlu yaradıcılığının pərəstişkarları - həm yaşlı nəslin nümayəndələri, həm də gənclər sevimli müğənnini səmimiyyətlə salamlamışlar.
Bölmənin digər xəbərləri
