“Politico”: Tramp Rusiyaya qarşı yeni sanksiyaların qəbulu üzrə işin intensivləşdirilməsini dəstəkləyir
Bakı, 9 iyul, AZƏRTAC
ABŞ Prezidenti Donald Tramp Vaşinqton tərəfindən Rusiyaya qarşı yeni sanksiyaların qəbulu üzrə işlərin intensivləşdirilməsini dəstəkləyir.
AZƏRTAC “Politico” nəşrinə istinadla xəbər verir ki, bunu amerikalı senator Lindsi Qrem jurnalistlərə deyib. Onun sözlərinə görə, Tramp Moskvaya qarşı sərt addımlara hazırdır. Senator, həmçinin qeyd edib ki, onun həmmüəllifi olduğu sanksiya layihəsinin son variantı ABŞ Prezidentinə xarici siyasətində çeviklik təmin etmək üçün daha geniş imkanlar yaradır.
Senatda respublikaçı çoxluğunun lideri Con Tyun da təsdiqləyib ki, hazırda qanun layihəsinin irəli sürülməsinə “böyük maraq” var. Eyni zamanda, bu məsələdə qanunvericilərin fəaliyyəti prezident administrasiyası ilə razılaşdırılır.
İyulun 8-də Tramp kabinetinin iclasında bildirib ki, Rusiyaya qarşı yeni sanksiyaları nəzərdə tutan qanun layihəsinin Konqresdən keçməsinə razılıq vermək imkanını “çox ciddi şəkildə” araşdırır.
Qanun layihəsi ilk dəfə aprelin əvvəlində Senat üzvlərindən ibarət ikipartiyalı qrup tərəfindən təqdim edilib. Sənədin əsas müəllifləri senatorlar Lindsi Qrem və demokrat Riçard Blumentaldır. Bu təşəbbüs, digər məsələlərlə yanaşı, Rusiyanın ticarət tərəfdaşlarına qarşı sanksiyaları da nəzərdə tutur. Senatorların təklifinə Rusiyadan neft, qaz, uran və digər mallar alan ölkələrdən ABŞ-a idxala 500 faiz rüsumların tətbiqi daxil edilib.
Bölmənin digər xəbərləri
