Politoloq: Azərbaycanın mübarizəsi xalqın və ordunun ruhunu özündə əks etdirən Vətən müharibəsidir
Bakı, 5 noyabr, Səadət Hakıyeva, AZƏRTAC
Sentyabrın 27-dən başlayaraq Azərbaycan Respublikasının Prezidenti İlham Əliyev dünyanın nüfuzlu kütləvi informasiya vasitələrinə müsahibələr verərək, dünya ictimaiyyətini münaqişənin tarixi, həqiqətdə baş verənlərlə bağlı ətraflı məlumatlandırır. Prezident İlham Əliyevin noyabrın 2-də İtaliyanın “La Repubblica” qəzetinə müsahibəsi də əvvəlkilər kimi bir çox məqamları ortaya çıxardı. Ən əsası odur ki, dövlətimizin başçısı birmənalı olaraq diqqətə çatdırdı ki, Azərbaycan öz ərazi bütövlüyü uğrunda və ərazisində döyüşür. 30 il gözləməkdən bezən və sonda öz işini özü həll etməyə qərar verən Azərbaycanın mübarizəsi xalqın və ordunun ruhunu özündə əks etdirən Vətən müharibəsidir.
Bunu AZƏRTAC-a açıqlamasında politoloq, siyasi ekspert Elxan Ələsgərov deyib.
Politoloq bildirib ki, Azərbaycan Prezidenti jurnalistin “Cənab Prezident, Siz artıq qələbəni dadmışınız” sualını həmişə olduğu kimi, təmkinlə və düşünülmüş şəkildə cavablandırdı. Dövlətimizin başçısı qeyd etdi ki, biz Vətən müharibəsini qələbə xatirinə deyil, öz ərazi bütövlüyümüz uğrunda aparırıq. “Bizim vəzifəmiz Azərbaycanın ərazi bütövlüyünü bərpa etmək idi və biz bu vəzifəyə yaxınlaşırıq. Biz ərazi bütövlüyünün bərpasını demək olar ki, 30 il idi gözləyirdik”. Prezident İlham Əliyev vurğuladı ki, Azərbaycan münaqişənin həll olunması üçün uzun müddət gözlədi və kifayət qədər təmkin və səbir nümayiş etdirdi. Amma münaqişənin dondurulması ilə barışa bilməzdik. Qeyd olundu ki, Azərbaycan nə qədər sülh istəsə də, Ermənistan rəhbərliyi çirkin siyasət yürüdərək öz bəyanatları və təxribatları ilə münaqişənin hərbi yolla həllinə gətirib çıxardı. Prezident birmənalı olaraq vurğuladı ki, biz bunu döyüş meydanında etməyə hər zaman hazır idik və bunu da edirik.
“İtaliya jurnalistinin Rusiyanın müdaxiləsi ilə bağlı digər sualına isə cavab belə oldu ki, Rusiya ATƏT-in Minsk qrupunun üzvüdür və BMT Təhlükəsizlik Şurasının daimi üzvlərindən biridir. Rusiya da daxil olmaqla, 3 ölkə 1993-cü ildə Ermənistan qoşunlarının Azərbaycan ərazilərindən dərhal, tam və qeyd-şərtsiz çıxarılmasını tələb edən qətnamələr qəbul ediblər. Bu qətnamələr yerinə yetirilmədiyi halda biz öz taleyimizi özümüz həll etməli idik və biz bunu etdik.
Dövlətimizin başçısı Türkiyənin dost və qardaş ölkə kimi hər zaman Azərbaycanın yanında olduğunu diqqətə çatdırdı və bildirdi ki, bu, yalnız siyasi və mənəvi dəstəkdir. İlk günlərdən Türkiyə kimi güclü ölkənin öz mövqeyini açıq şəkildə bəyan etməsi həm də bütün dünyaya bir mesaj idi ki, Azərbaycan doğru işi görür və öz ərazi bütövlüyünü bərpa edir”, - Elxan Ələsgərov deyib.
Politoloqun sözlərinə görə, öz əzəli torpaqları uğrunda döyüşən Azərbaycan Ordusunun uğurları bir çoxlarını narahat edir. Fransa Prezidenti Makron və digərləri Azərbaycan Ordusunda muzdluların döyüşməsi ilə bağlı iddialar səsləndirmişdilər. Bu iddiaların heç bir əsası yoxdur və Azərbaycanın kifayət qədər güclü ordusu var, sıralarına 100 min yüksək hazırlıqlı əsgəri döyüşür. Prezident İlham Əliyev müsahibəsinə bir daha bildirdi ki, Azərbaycan tərəfində muzdluların döyüşməsi barədə uydurma iddialar ölkəmizə qarşı siyasi hücum təəssüratı yaradır. Amma xarici ölkə vətəndaşlarının Ermənistan tərəfindən döyüşdüyünə dair kifayət qədər sübut vardır. Üstəlik, PKK və Yaxın Şərqdən bəzi terrorçular qondarma “Dağlıq Qarabağ ordusu”na qoşulublar. Amma düşmən bunu inkar edir. Ermənistan bunu inkar etməklə, əslində, beynəlxalq hüquqa zidd olan əməlini ört-basdır etməyə çalışır.
Siyasi ekspert vurğulayıb ki, xalqımız hər zaman humanistliyi, qonaqpərvərliyi ilə seçilir və ölkəmiz dünyada multikultural ölkə kimi tanınır. Azərbaycan Prezidenti müsahibəsində bunu bir daha təsdiq etdi. Dövlətimizin başçısı birmənalı olaraq vurğuladı: “Dağlıq Qarabağda yaşayan ermənilər əmin ola bilərlər ki, onların təhlükəsizliyi təmin olunacaq və əvvəlkindən daha da yaxşı yaşayacaqlar”.
Bölmənin digər xəbərləri
