Politoloq: İndi Qubadlı üçün yeni dövr başlayıb
Bakı, 30 oktyabr, AZƏRTAC
Qubadlı rayonunun işğaldan azad olunması mühüm strateji əhəmiyyətə malik idi. Çünki Qubadlının azad edilməsindən sonra Azərbaycan Ordusu Laçın dəhlizinə çıxdı. Dəhlizə nəzarətin ələ alınması müharibənin müqəddəratını demək olar həll etdi. Laçın dəhlizinin Qarabağın tranzit, logistika imkanları nöqteyi-nəzərdən də böyük əhəmiyyəti var. Bununla da müharibədə əsaslı dönüş yarandı və ermənilər öz məğlubiyyətlərini dərk etdilər. Daha sonra rəşadətli Ordumuz Şuşaya daxil oldu və 30 ilə yaxın müddət ərzində işğal altında qalmış mədəniyyət beşiyimizi düşmən tapdağından xilas etdi. Son nəticədə tarixi Zəfər qazandıq.
Hazırda Qubadlı üçün yeni dövr başlayıb. İndi Qubadlının yenidən qurulması, bərpası və erməni vandallarının uzun illər ərzində həyata keçirdiyi dağıdıcı fəaliyyətin nəticələrinin aradan qaldırılması dövrüdür. Burada quruculuq işləri əsas etibarilə infrastruktur layihələrinin icrası ilə başlayıb. Avtomobil yollarının tikintisi davam edir. Eyni zamanda, əsas məsələ ərazilərin minalardan təmizlənməsidir. İşğal dövründə Qubadlı rayonunda da küllü miqdarda mina basdırılıb. Minalardan təmizlənmə prosesindən sonra yaşayış evlərinin inşası aparılacaq və öz yurdlarından, obalarından didərgin düşmüş qubadlılıların isti ocaqlarına qaytarılması prosesi başlayacaq.
Bu fikirləri AZƏRTAC-a açıqlamasında politoloq İlyas Hüseynov söyləyib.
Politoloqun sözlərinə görə, işğaldan azad olunan ərazilərin sakinləri ilə görüşlərin keçirilməsi ənənə halını alıb. Həmin görüşlər zamanı çox səmimi münasibətlər diqqəti cəlb edir. Azad edilmiş rayonların sakinləri həm Müzəffər Ali Baş Komandan, Prezident İlham Əliyevə, həm də birinci xanım Mehriban Əliyevaya minnətdarlıqlarını bildirirlər. Onlar böyük qürur, sevinc və fəxarət hissi ilə, qalib ölkənin qalib vətəndaşı kimi doğma yurdlarına səfər edirlər. Görüşlər zamanı vurğulanır ki, biz əbədi olaraq həmin torpaqlarda yaşayacaq və qurub yaradacağıq. Azərbaycan xalqı qurucu xalqdır və əminliklə demək olar ki, həmin ərazilərə qayıdan soydaşlarımız çox tez bir zamanda işğaldan azad edilən torpaqları dünyanın ən çiçəklənən diyarlarına çevirəcəklər. Həmin ərazilərdə turist axınına səbəb olacaq məkanlar inşa ediləcək.
Qubadlı rayonunun geoiqtisadi və geosiyasi baxımdan mühüm əhəmiyyətə malik olduğunu deyən İlyas Hüseynov bildirib ki, bu istiqamətdə aparılan uğurlu hərbi əməliyyatlar böyük Qələbəmizdə əsaslı rol oynadı. “Müzəffər Ali Baş Komandanın rəhbərliyi altında Azərbaycan Ordusu tarix yazdı. Qubadlı zəfəri hər il böyük fəxarət və qürur hissi ilə xatırlanacaq. Azərbaycan Ordusu 2020-ci ildə qazandığı tarixi Qələbə nəticəsində təqvimdə olan işğal günlərini zəfər günləri ilə əvəzlədi. Buna görə şəhidlərimizin ruhu qarşısında baş əyir, qazilərimizə bir ömür minnətdarlıq hissi duyuruq. Sevindirici haldır ki, gələcək nəsillər, məktəblilər Zəfər tarixini öyrənərək böyüyəcəklər. Möhtəşəm Qələbəmizin qəhrəmanları, onların şücaəti silsilə şəkildə gələcək nəsillərə ötürüləcək”, - deyə politoloq fikirlərini yekunlaşdırıb.
Bölmənin digər xəbərləri
