Politoloq: Naxçıvan yeni nəqliyyat qovşağına çevrilir
Bakı, 27 sentyabr, AZƏRTAC
İki qardaş ölkə olan Türkiyə ilə Azərbaycan arasında münasibətlər özünün yeni mərhələsinə qədəm qoyur. Bunu Türkiyə Prezidenti Rəcəb Tayyib Ərdoğanın sentyabrın 25-də Azərbaycana rəsmi səfəri də təsdiqlədi. Naxçıvanda bir araya gələn dövlət başçıları münasibətlərin inkişafında rol oynayacaq yeni sənədlərə imza atdılar.
Rəcəb Tayyib Ərdoğanın budəfəki səfəri Azərbaycan ilə Türkiyə arasında münasibətlərin daha da dərinləşməsinə, eyni zamanda, regional münasibətlərin dinamikasına müsbət təsirini göstərəcək.
Bu fikirləri AZƏRTAC-a açıqlamasında politoloq İlqar Vəlizadə söyləyib.
İkinci Qarabağ müharibəsindəki Qələbədən sonra Azərbaycanın nəqliyyat-kommunikasiya, logistika imkanlarını genişləndirməsi üçün çox əlverişli imkan yarandığını qeyd edən politoloq Zəngəzur dəhlizinin əhəmiyyətindən danışaraq deyib: “Zəngilanı Naxçıvandan cəmi 40 kilometrlik Zəngəzur dəhlizi ayırır. Dəhlizin bərpa olunması ölkəmizə yeni iqtisadi perspektivlər qazandıracaq. Şərqi Zəngəzur bölgəsində yerləşən Zəngilanı qədim torpağımız Qərbi Zəngəzurla, sonra isə Ordubad vasitəsilə Naxçıvan və Türkiyə ilə birləşdirmək növbəti uğurumuz olacaq. Naxçıvan Azərbaycan-Türkiyə münasibətlərinin yeni mərhələsinə start verən məkan rolunu oynadı. Çünki Naxçıvan elə bir bölgədə yerləşir ki, gələcəkdə mühüm yol infrastrukturunun, eləcə də Zəngəzur dəhlizinə bitişik ərazilərdə magistral yolların, yüksək gərginlikli elektrik xətlərinin habı rolunu oynaya bilər. Naxçıvan yeni nəqliyyat qovşağına çevrilməkdədir”.
Türkiyə Prezidenti Rəcəb Tayyib Ərdoğanın səfərinin Naxçıvanın qovşağa çevrilməsi istiqamətində müstəsna rol oynayacağını diqqətə çatdıran İlqar Vəlizadə qeyd edib: “Yeri gəlmişkən qeyd etmək lazımdır ki, Ərdoğan 44 günlük Vətən müharibəsindən sonra Azərbaycana səfər edən ilk dövlət başçısı idi. Həmin vaxt Bakıdan həm regiona, həm də dünyaya mühüm mesajlar verilmişdi. “3+3” formatı ilə bağlı təşəbbüs irəli sürülmüşdü və regionda postmüharibə dövründə yeni siyasi mənzərənin yaranması ilə bağlı təkliflər irəli sürülmüşdü.
Sentyabrın 19-da Qarabağda həyata keçirilən lokal xarakterli antiterror tədbirlərindən sonra Türkiyə Prezidenti yenə ölkəmizə səfər etdi. Naxçıvan görüşündə Ermənistana növbəti dəfə vacib mesajlar verildi. Ermənistan bu mesajlardan nəticə çıxarmalıdır. Bu ölkə imkanlarını düzgün qiymətləndirməyi bacarmasa, nəticələri çox ağır olacaq”.
İğdır-Naxçıvan qaz kəmərinin çəkilişinin iki ölkə arasında münasibətlərin tarixində mühüm hadisə olduğunu qeyd edən politoloq bunun əlaqələrin inkişafına yeni təkan olacağını və Naxçıvanın enerji təhlükəsizliyinin tam təmin olunmasına imkan verəcəyini bildirib.
Bölmənin digər xəbərləri
