Prezident İlham Əliyev Ulu Öndərin xilaskarlıq missiyasını şərəflə yerinə yetirir
Bakı, 17 mart, AZƏRTAC
Azərbaycan özünün itirilmiş müstəqilliyini 1991-ci ilin oktyabrında yenidən bərpa etdi. Bu, çox böyük bir tarixi hadisə, xalqımızın həyatında yeni bir dönüş nöqtəsi idi. Lakin təəssüf ki, müstəqilliyin ilk illərində çətin, ağır vəziyyət, gərginlik yaşandı. Qarışıqlıq, anarxiya, xaos, hətta müstəqilliyimizi itirmək təhlükəsi ilə üzləşildi, 1993-cü ilin iyununda isə ölkədə vətəndaş müharibəsi, qardaş qırğını təhlükəsi yarandı. Belə bir şəraitdə nəinki müstəqilliyimizin itirilməsi, bütövlükdə Azərbaycanın dünyanın xəritəsindən silinmək təhlükəsi meydana çıxdı.
Belə bir təhlükəli şəraitdə xalq üzünü dahi şəxsiyyət Heydər Əliyevə tutdu. Çünki hamı yaxşı başa düşür, anlayırdı ki, respublikanı bu çətin, ağır böhrandan yalnız Heydər Əliyev kimi bacarıqlı, uzaqgörən, qətiyyətli bir rəhbər çıxara bilər. Ona görə də Heydər Əliyevin xalqın təkidli tələbi və xahişi ilə yenidən hakimiyyətə qayıdışı Azərbaycan tarixinin, bərpa edilmiş müstəqilliyimizin yeni bir dövrünün əsasını qoydu, Azərbaycan xalqı, Azərbaycan dövlətçiliyi, müstəqilliyimiz xilas edildi.
Bu sözləri AZƏRTAC-a açıqlamasında Milli Məclisin deputatı Rəşad Mahmudov deyib.
Deputat fikirlərini davam etdirərək bildirib ki, Ümummilli Liderin müdrik daxili və xarici siyasəti nəticəsində qısa zaman ərzində hüquqi demokratik dövlət quruculuğu, Milli Ordunun formalaşdırılması, beynəlxalq aləmdə Azərbaycanın nüfuzunun yüksəldilməsi sahəsində böyük işlər görüldü. Ulu Öndər dünyanın bir çox aparıcı dövlətlərinin rəhbərləri, nüfuzlu beynəlxalq təşkilatlar və işgüzar dairələrlə yüksək səviyyəli rəsmi görüşlər keçirdi, Qarabağ münaqişəsinin dinc yolla nizama salınması, işğal edilmiş torpaqlarımızın azad olunması istiqamətində ardıcıl, fəal xarici siyasət yürütdü: “Onu da xatırladım ki, Heydər Əliyevin yenidən hakimiyyətə qayıdışından sonra-1994-cü ilin oktyabr və 1995-ci ilin martında dövlət çevrilişlərinə cəhdlər oldu. Lakin dahi şəxsiyyətin xalqa möhkəm bağlılığı, nüfuzu, ən gərgin anlarda vəziyyəti real qiymətləndirmək bacarığı, ən başlıcası isə qətiyyəti sayəsində həmin cəhdlərin qarşısı alındı. Eyni zamanda, düşmənin məkrli planı, Azərbaycanı daxildən parçalamaq niyyəti dövlət başçısının siyasi uzaqgörənliyi ilə puça çıxdı. Dövlət çevrilişinə cəhd göstərən qüvvələr bu zaman mühüm bir həqiqəti- xalq amilini unutmuşdular. Belə ki, həmin hadisələr zamanı xalqımız dövlətçilik prinsiplərinə sədaqətini, ulu öndərin yürütdüyü xarici və daxili siyasəti dəstəklədiyini yekdilliklə nümayiş etdirdi”.
Rəşad Mahmudov daha sonra deyib: “Xalq amili ikinci Qarabağ müharibəsində də öz təsdiqini tapdı. Vətən müharibəsində qələbəmizin əsasında möhtərəm dövlət başçımızın qətiyyəti, müdrik siyasəti, Silahlı Qüvvələrimizin güc-qüdrəti nə qədər mühüm əhəmiyyətə malik idisə, xalq-Prezident-ordu vəhdəti, birliyi də bir o qədər önəm daşıdı. Yeri gəlmişkən, burada bir məqamı da qeyd etmək istərdim. Vətən müharibəsində erməni işğalçılarından fərqli olaraq, Azərbaycan Ordusu humanizm prinsiplərinə sadiq qalaraq, öz missiyasını şərəflə yerinə yetirdi, mülki əhaliyə qarşı həssas münasibət göstərdi, ancaq hərbi birləşmələrə qarşı döyüşdü, düşməni məğlub edərək, işğalçını torpaqlarımızdan qovdu”.
Erməni vandalları isə barbarlıqlarını həm müharibənin gedişində, həm də atəşkəs vaxtlarında nümayiş etdirdi. Bununla bağlı Prezident İlham Əliyev Füzuli və Xocavənd rayonlarına səfəri zamanı dedi: “Müharibə Azərbaycan və Ermənistan arasında olan fərqi bir daha dünyaya aşkar şəkildə nümayiş etdirib. Bizim bütün şəhərlərimiz dağıdılıb, bütün kəndlərimiz dağıdılıb, tarixi abidələr dağıdılıb, məscidlər dağıdılıb, qəbirlər dağıdılıb, misli görünməmiş vandallıq, barbarlıq törədilib. Biz isə ancaq öz torpaqlarımızı azad etmişik. Bütün binalarımızı dağıdıblar, məscidlərimizi dağıdıblar. Məscidlərdə heyvan saxlayıblar. Bizim müqəddəs abidələrimizi təhqir ediblər”.
Dövlətimizin başçısı Hadrutun Hünərli kəndindəki Alban məbədində olarkən bunun bir daha şahidi olduq. Eyni zamanda, düşmən tərəfindən tarixi faktların saxtalaşdırılmasının rəsmi İrəvanın dövlət siyasətinə çevrildiyini gördük.
Prezident İlham Əliyev erməni vandalizmi ilə əlaqədar fikirlərini bölüşərkən bildirdi: “Ermənilər bu kilsəni də erməniləşdirmək istəmişlər və burada erməni dilində yazılar yazmışlar, ancaq buna nail ola bilməmişlər. İndi əgər bu, erməni kilsəsi olsaydı, bunu belə vəziyyətdə qoyardılarmı? Tövləyə oxşayır, elə bil ki, tövlədir, zibilxanadır. Bu, bizim qədim tarixi abidəmizdir, udi qardaşlarımızın məbədidir. Onlar buraya da gələcəklər. Ermənilər necə ki, bizim məscidlərimizi təhqir ediblər, qədim Alban məbədini də təhqir etmişlər. Amma biz bərpa edəcəyik. Bütün bu yazılar saxta yazılardır, sonradan yazılmış yazılardır. Onlar bizim qədim torpaqlarımızda özləri üçün saxta tarix yaradıblar. Amma buna nail ola bilməyiblər, biz onları ifşa etmişik...”
Deputat əlavə edib ki, erməni faşizmi Azərbaycan xalqının əcdadlarının yaşadığı Azıx mağarasında da barbar əməllər törədiblər. Dövlətimizin başçısının vurğuladığı kimi, onlar burada qanunsuz olaraq işlər aparıblar, xaricdən qanunsuz şəkildə alimlər gətiriblər, mağaraya, bizim tarixi irsimizə böyük ziyan vurublar. Beləliklə, bu gün işğaldan azad edilən ərazilərimizdə erməni vandallarının illərlə törətdikləri vəhşi əməllər hər addımda nəzərə çarpır. Viran qoyulan şəhər və kəndlərimiz, dağıdılan, təhqir edilən məscidlərimiz, yer üzündən silinən tarix və mədəniyyət abidələrimiz düşmənin nə qədər barbar, vəhşi olduğunu göstərir.
Əlbəttə, bütün dağıntılar məqsədli şəkildə edilib. Mənfur düşmən Ermənistan ərazisindəki tarixi torpaqlarımızda, Dağlıq Qarabağda və ətraf rayonlarda azərbaycanlılara aid tarixi mirasları viran qoymaqla azərbaycanlıların bu ərazidəki mədəni kimliyinin itirilməsi məqsədi güdüb. Bu torpaqlarda bütün milli izlərimizi silməyə çalışıb.
Bölmənin digər xəbərləri
