Qaçqınlar komandası “Tokio-2020” Olimpiya Oyunlarında medallar almaq həvəsindədir
Aşqabad, 22 sentyabr, AZƏRTAC
Qapalı məkanlarda və döyüş sənəti üzrə V Asiya Oyunlarında iştirak etmiş Qaçqınlar komandasının üzvləri ümidvar olduqlarını bildiriblər ki, gələcəkdə onların dünya səviyyəli yarışlarda iştirak etmələrinə imkan yaradılacaq.
AZƏRTAC xəbər verir ki, Teqla Lorupe tərəfindən Nayrobidə (Keniya) təsis edilmiş “Sülh fondu”nun himayəsi ilə keçirilmiş seçmə yarışlardan sonra 5 idmançı - Paulo Amotun Lokoro, Viyual Puok Denq, Qay Yanq Tap, Ukuk Utxu Bul və Yek Pur Biyel “Aşqabad-2017” Oyunlarında iştirak etmək üçün seçilib.
800 metr məsafəyə qaçışda yarımfinal mərhələsinə gəlib çatmış Biyel etiraf edib ki, bu təcrübə onun üçün çox əhəmiyyətli olub. Biyel “Aşqabad-2017” Oyunlarının İcraiyyə Komitəsinə təşəkkürünü bildirərək deyib: “Mən iştirak etdiyim “Rio-2016” Olimpiya Oyunlarından sonra bu yarışlar mənim üçün ikinci mühüm hadisədir. Rioda və Aşqabadda iştirakımız sübut etdi ki, biz qaçqınlar da bu dünyada nə isə edə bilmişik”.
Biyel daha sonra deyib: “İdman sayəsində çox qapılar bizim üzümüzə açılıb. O, bizə yeni ümidlər verib. Türkmənistan haqqında məlumatımız az idi, indi isə əmin oldum ki, bura çox qonaqpərvər ölkədir. Biz gələcəkdə bir sıra başqa oyunlarda iştirak etmək üçün buraya qayıtmaq istərdik”.
Nümayəndə heyətinin rəhbəri Teqla Lorupe yarımmarafon qaçışlarında üçqat dünya çempionudur. Keniyanı üç dəfə Olimpiya Oyunlarında təmsil etmiş bu idmançı daha iri yarışların təşkilatçılarına müraciətlə onları Qaçqınlar komandasını da qarşılamağa çağırıb.
Lorupe etiraf edib ki, Afrikadan və digər qitələrdən olan idmançılar yarışlarda iştirak etmək üçün dünyanın istənilən nöqtəsinə getmək imkanına malik olduğu halda Qaçqınlar komandasının bu cür imkanı yoxdur. Lakin idmanın onlara bu məsələdə necə kömək etdiyini görmək çox xoşdur.
Nümayəndə heyətinin başçısı deyib: “Ümidvaram ki, qaçqınların yüksək beynəlxalq səviyyədə yarışa bilmələri üçün digər iri tədbirlərin təşkilatçıları da öz qapılarını Qaçqınlar komandasının üzünə açacaqlar. Bu fəaliyyət təkcə yüngül atletika ilə məhdudlaşmamalıdır. Taekvondo və karate kimi idman növlərini təmsil edən çox istedadlı kişi və qadın idmançılar var. Ümid edək ki, Qaçqınlar komandası üçün daha böyük imkanlar yaradılacaq və onlar idmanın bu növləri üzrə yarışlarda iştirak edə biləcəklər”.
3000 metr məsafəyə qaçışda final mərhələsinə çatmış və finiş xəttini yeddinci keçmiş Bul etiraf edib ki, onların Beynəlxalq Olimpiya Komitəsi (BOK) tərəfindən dəstəklənməyə ehtiyacları var. O deyib: “BOK bizə əvvəllər çox kömək edib. Bu, bizim Rio Olimpiya Oyunlarında iştirak etməyimizə imkan verib”.
Lorupe deyib ki, onun yetirmələri “Tokio-2020” Olimpiya Oyunlarında daha yüksək nəticələrə nail olmağı qarşıya məqsəd qoyublar. O daha sonra deyib: “Rio-2016” başlanğıc idi. 2020-ci ildə Qaçqınlar komandasının hədəfi finala çatmaq və bəlkə də qızıl medal qazanmaqdır. Burada mümkün olmayan heç nə yoxdur”.
Səxavət Quliyev
AZƏRTAC-ın müxbiri
Aşqabad
Bölmənin digər xəbərləri
