Qanunsuz erməni silahlıları ərazimizdə təhlükə mənbəyi kimi qalmaqdadır - Açıqlama
Bakı, 26 avqust, AZƏRTAС
Ermənistan son günlər təxribatlarını intensivləşdirib. Təxribatlar həm iki ölkənin şərti sərhədində, həm də Rusiya sülhməramlılarının müvəqqəti nəzarətində olan Azərbaycan ərazilərində həyata keçirilir. Azərbaycanla Ermənistan arasında gərginliyin artması dəfələrlə proqnozlaşdırılırdı. Buna da səbəb Ermənistanın hərbi-siyasi rəhbərlərinin və onların havadarlarının qeyri-konstruktiv mövqeyi, sülh müqaviləsinin imzalanmasını ləngitməsi, bu ölkənin silahlandırılması və regionda gərginliyin saxlanılmasının marağında olan qüvvələrin aktivləşməsidir. Sülh sazişinin imzalanması prosesi, Rusiya, Qərb və ABŞ-da danışıqlar platformasının aktivləşdiyi zamanda Azərbaycan öz konkret fəaliyyəti ilə Ermənistanın manipulyasiya imkanlarını məhdudlaşdırır. Belə olduğu halda Ermənistan rəhbərliyi və onun havadarları, regionu gərginlikdə saxlamaq istəyən qüvvələr fəallaşıb.
Bunu AZƏRTAC-a açıqlamasında ehtiyatda olan polkovnik, Qarabağ müharibəsi və Silahlı Qüvvələrin veteranı, hərbi ekspert Şair Ramaldanov deyib.
“Ermənistan üçün sülh müqaviləsinin imzalanmamasının, gərginliyin saxlanılmasının yeganə yolu məhz atəşkəsin pozulmasıdır. Son zamanlar görürük ki, atəşkəsin pozulma coğrafiyası genişlənib. Əgər əvvəllər Azərbaycan Müdafiə Nazirliyi bir istiqamətdə Ordumuzun mövqelərinin atəşə tutulması barədə məlumat yayırdısa, indi artıq iki ölkənin şərti sərhədində, hətta Naxçıvan istiqamətində, digər tərəfdən isə Qarabağ iqtisadi rayonundakı Rusiya sülhməramlı qüvvələrinin yerləşdiyi ərazidə atəşkəs pozulur, təxribatlar törədilməyə cəhd göstərilir. Əlbəttə, Azərbaycan Ordusu bütün bunlara soyuqqanlıqla adekvat cavab verir. Ancaq bu təxribatların hamısı ümumiyyətlə vəziyyətin gərginləşməsinə gətirib çıxarır”, - deyə hərbi ekspert bildirib.
Ş.Ramaldanovun fikrincə, hazırda müxtəlif platformada sülh müqaviləsinin imzalanması barədə müzakirələr aparılır. Ancaq buna baxmayaraq, böyük təsirə malik olan Rusiya, Qərb və ABŞ kiçik Ermənistanı sülh müqaviləsinin imzalaması ilə bağlı konkret addımlar atmaq üçün məcbur etmir. Digər tərəfdən də bu platformalarda fəallığın artması zamanı görürük ki, həmin ölkələr proseslərə bir addım önə, iki addım arxaya prinsipi ilə yanaşırlar. Bu ilin sonlarına qədər sülh sazişinin imzalanması ilə bağlı konkret nəticələrin əldə olunacağına ümid var. Ancaq bütün bu səylər məhz Ermənistan və yaxud bölgədə sülh istəməyən qüvvələr tərəfindən atəşkəsi pozmaqla, təxribat törətməklə boşa çıxır. Həmçinin müəyyən radioelektron qurğuları aktivləşdirməklə təyyarələrə təsir göstərilir. Rusiyanın sülhməramlı qüvvələrinin yerləşdiyi Azərbaycan ərazilərində texniki müşahidə vasitələrinin sayı çoxaldılır. Eləcə də gərginliyə səbəb olan müdafiə sədləri yaradılır, ordumuzun mövqelərinə yaxın uzunmüddətli yerləşdirilən fortifikasiya qurğularının sayı artırılır, minalanma və mühəndis-istehkam işləri görülür.
Digər səbəb gələcəkdə Cənubi Qafqaz regionunda vəziyyəti yenidən gərginləşdirmək, silahlı qarşıdurmaya gətirib çıxarmaqdır. Ermənistanın bu addımları atırsa, o təqdirdə hansısa sülh müqaviləsi imzalamaqdan söhbət gedə bilməz. Yenə də proses uzanacaq. Burada böyük dövlətlər regiondakı öz maraqlarını müəyyən şəkildə təmin etməyə çalışacaqlar. Bunlar Azərbaycanın maraqlarına uyğun deyil və ikili standartlarda özünü göstərir. Ona görə də sərhəddə vəziyyət gərgin olaraq qalır.
“Eyni zamanda, qanunsuz silahlıların Qarabağdan çıxarılması ilə bağlı üçtərəfli birgə Bəyanatının dördüncü bəndi yerinə yetirilmir, Rusiya sülhməramlı qüvvələri onları himayə edir, təhlükəsizliyini təmin etməsi məqsədilə müşayiət edir. Bu onu göstərir ki, Qarabağda məhz sülhü qorumağa çağırılan və yerləşdirilən Rusiyanın sülhməramlı kontingenti tam əksinə fəaliyyət göstərərək bütün müsbət prosesləri əngəlləməklə məşğuldur. Üç ilin ötməsinə baxmayaraq, reinteqrasiya məsələləri hələ də başlamayıb. Baxmayaraq ki, Qarabağ iqtisadi rayonunda yaşayan ermənilər dəfələrlə Azərbaycan vətəndaşlığına qəbul olmaq istəyi haqqında müraciətlərini bildiriblər”, - deyə ehtiyatda olan polkovnik vurğulayıb.
Ş.Ramaldanovun sözlərinə görə, Qarabağda yaşayan ermənilər ərazidəki terrorçuların, separatçıların və onları himayə edən Rusiya sülhməramlı qüvvələrinin girovuna çevriliblər. Hazırda Azərbaycan ərazisində təhlükə mənbəyi olan qanunsuz erməni hərbi birləşmələrinin tərk-silah olunması, onların Azərbaycandan çıxarılması məsələsi daha ciddidir və burada Azərbaycanın güclü iradəsi ortaya qoyulub. Bu təhlükə ilə ölkəmiz daim yaşaya bilməz. Azərbaycanın Vətən müharibəsində şanlı Qələbə qazanmasına, ərazi bütövlüyünü bərpa etməsinə, Ermənistanın işğalçı ordusunu darmadağın etməsinə baxmayaraq, indi də həmin qanunsuz silahlılar ərazimizdə təhlükə mənbəyi kimi qalır. Hazırda həmin terrorçuların silahı Azərbaycan əsgərinə, dinc əhalisinə, yaşayış məntəqələrinə tuşlanıb. Belə olan halda Azərbaycan dövləti təhlükəsizliyini təmin edəcək.
“Hələ ki, bütün məsələləri danışıqlar yolu ilə həll etmək istəyən Azərbaycan güc variantını da istisna etmir. Əgər müzakirələrin limiti bitərsə və sərhəddə vəziyyət gərgin olaraq qalarsa, Azərbaycan beynəlxalq hüquq normaları çərçivəsində antiterror əməliyyatı apararaq bu təhlükəni aradan qaldırmalı olacaq. Dövlətimiz gördüyü işlərlə iradəsini göstərir ki, o sülhün tərəfdarıdır, digər tərəfdən də öz vətəndaşlarının təhlükəsizliyi üçün tədbirlər görəcəyini və qanunsuz silahlıları Azərbaycandan təmizləyəcəyini gizlətmir.
Əgər qarşı tərəf yenə də şərti sərhəddə ölkəmizin yaşayış məntəqələrinə və dinc əhaliyə təhlükə yaradarsa, o təqdirdə Azərbaycanın güc tətbiq etmək hüququ var. Azərbaycan ərazisində terrorçuların yerləşdirdiyi radioelektron vasitələr ordumuz üçün legitim hədəflərdir və bölmələrimiz ermənilərin müşahidə qurğularını məhv etməyə davam edəcək. Azərbaycan qarşıda qoyulan məqsədlərə nail olmaq, öz maraqlarının müdafiəsini, sakinlərinin təhlükəsizliyini təmin etmək məqsədi ilə bundan sonra lazımi bütün addımları atacaq”, - deyə ekspert diqqətə çatdırıb.
Bölmənin digər xəbərləri
