“QARABAĞ UĞRUNDA SAVAŞ” KİTABI ALMAN DİLİNDƏ ÇAPDAN ÇIXMIŞDIR
Berlində fəaliyyət göstərən Nizami adına Azərbaycan Mədəniyyət İnstitutundan AZƏRTAC-ın xüsusi müxbirinə bildirmişlər ki, bu günlərdə institutun rəhbəri şair, yazıçı və publisist Nuridə Atəşinin alman dilində “Qarabağ uğrunda savaş” adlı kitabı nəşr edilmişdir. 6 bölmədən ibarət kitabın birinci fəslində Azərbaycanın tarixi, ölkənin və onun xalqının qədim, zəngin mədəniyyəti, ədəbi irsi, müdrik şəxsiyyətləri haqqında alman oxucusuna ətraflı məlumat verilmişdir.Kitabın ikinci fəslində bugünkü Azərbaycanın müstəqillik tarixindən, dövlətçiliyinin inkişaf mərhələlərindən, suveren dövlət kimi inkişafının, dünya birliyində mövqeyindən, gündən-günə artmaqda olan beynəlxalq nüfuzundan, ölkəmizdə gedən siyasi-iqtisadi proseslərdən, iqtisadi yüksəlişdən bəhs edilir.
“Qarabağ münaqişəsi” adlanan növbəti fəsildə Ermənistan-Azərbaycan, Dağlıq Qarabağ münaqişəsinin səbəblərindən, münaqişənin mahiyyətindən söhbət açılır. Azərbaycan torpaqlarının zaman-zaman ələ keçirilməsi, xalqımızın mütəmadi olaraq ata-baba torpaqlarından planlı şəkildə köçürülməsi, Qafqazda azərbaycanlılara qarşı məqsədyönlü şəkildə həyata keçirilmiş etnik təmizləmə, deportasiya və soyqırımı siyasətinin acı və ağır nəticələri, Qanlı yanvar, Xocalı faciələri, onların kökləri, tarixi faktlar və sənədlər vasitəsilə diqqətə çatdırılır, bədnam ermənilərin rəzil işğalçılıq əməlləri ifşa olunur.
Daha sonra müəllif başda Azərbaycan Prezidenti İlham Əliyev olmaqla Azərbaycan dövlətinin Qarabağ münaqişəsinin həllinə münasibətləri açıqlanır. Bu fəsildə xarici işlər naziri Elmar Məmmədyarov, Milli Məclisin AŞPA-dakı nümayəndə heyətinin rəhbəri Səməd Seyidovla müəllifin Qarabağ münaqişəsi mövzusunda müsahibələri də dərc olunmuşdur.
Beşinci hissədə 2006-cı ildə Dağlıq Qarabağ münaqişəsinin sülh yolu ilə həll olunması ətrafında aparılmış beynəlxalq rəsmi danışıqların müzakirəsinin əhatəli xronikası öz əksini tapmışdır.
Almaniya Bundestaqının üzvləri ilə Qarabağ münaqişəsinə dair müsahibələr də maraq doğurur. Almaniya Parlamenti Qafqaz Dostluq Qrupunun başçısı Ştefan Rayxe, qrupun üzvlərindən Villi Vimmer və Almaniya Daxili İşlər Nazirliyinin dövlət katibi Kristv Berqner ilə məxsusi müsahibələr kitabda xüsusi yer tutur.
Müəllif işğal olunmuş Azərbaycan torpaqlarının azad edilməsinə, bir milyondan artıq insanın öz yurdlarına qayıtmasına nail olmaq üçün dünya ictimaiyyətini, beynəlxalq təşkilatları Azərbaycanın haqq işinə münasibətdə obyektiv və qərəzsiz olmağa, xalqımıza qarşı törədilmiş dəhşətli cinayətlərə düzgün siyasi-hüquqi qiymət verməyə çağırır.
Bölmənin digər xəbərləri
