Qaradağ rayonunda Eldar şamını qanunsuz kəsən şəxs cəzalandırılıb
Bakı, 4 oktyabr, AZƏRTAC
Ekologiya və Təbii Sərvətlər Nazirliyinin “Qaynar xətt”inə Qaradağ rayon sakini Nizami Cəfərov tərəfindən Ələt qəsəbəsində hərbi şəhərciyin ərazisində ağacların qanunsuz kəsilməsi ilə bağlı şikayət daxil olub. Şikayət nazirliyin əməkdaşları tərəfindən ərazi üzrə Mənzil İstismar Sahəsinin nümayəndələrinin və şikayətçinin iştirakı ilə yerində araşdırılıb.
Nazirliyin mətbuat xidmətindən AZƏRTAC-a bildirilib ki, həmin əraziyə keçirilən baxış zamanı yaşköküstə, diametri 49 santimetr olan bir Eldar şamı ağacının qanunsuz kəsildiyi məlum olub. Aparılan araşdırma zamanı ağacı Qaradağ rayonu Ələt qəsəbə sakini Rəşad Fərzəliyevin kəsdiyi və təbiətə 2550 manat məbləğində ziyan vurduğu müəyyən edilib. Faktla bağlı qanun pozucusu barəsində protokol tərtib olunub.
Dəymiş ziyanın məbləği cinayət tərkibi yaratdığından qanun pozuntusu ilə bağlı toplanmış materiallar məsələyə hüquqi qiymət verilməsi və təqsirkar barəsində qanunauyğun tədbirlərin görülməsi üçün Qaradağ Rayon Prokurorluğuna göndərilib.
Bölmənin digər xəbərləri
