MƏDƏNİYYƏT
Qardaş ölkə “AITF 2019” sərgisinə yeni “Türkiyə” imici ilə qatılıb
Bakı, 4 aprel, AZƏRTAC
Bakı Ekspo Mərkəzində keçirilən 18-ci Azərbaycan Beynəlxalq “Turizm və Səyahətlər” (“AITF 2019”) sərgisində Türkiyə stendində “Türkiyə” imici və “Göbeklitepe ili” önə çıxarılıb.
AZƏRTAC xəbər verir ki, “Iteca Caspian” şirkətinin təşkilatçılığı ilə baş tutan tədbirə bu il Türkiyə bir sıra ciddi yeniliklərlə qatılıb.
Türk stendində ziyarətçilərə ənənəvi, qədim texnikası ilə bişirilən türk qəhvəsi, lokumu, paxlavası, quru meyvələri və özünəməxsus qədim şirniyyatları təqdim edilir. Stendə gələn turizm təmsilçiləri üçün bu il xüsusi görüş otağı da hazırlanıb. Burada müzakirələr aparılır və turizm sahəsində görülən işlərdən danışılır.
Sərginin Türkiyə üzrə təşkilatçısı, Türkiyənin ölkəmizdəki səfirliyinin mədəniyyət və təbliğat müşaviri İrfan Çiftçinin verdiyi məlumata görə, dünyanın ilk beş böyük turizm ölkəsindən biri olan Türkiyə bu ildən etibarən “Türkiyə eviniz” şüarı əvəzinə, sadəcə “Türkiyə” loqosu ilə təbliğatını aparır. Sərgidə Türkiyənin Mədəniyyət və Turizm Nazirliyi turizm firmaları ilə yanaşı, Otellər birliyi, Səyahət Şirkətləri Federasiyası, İzmir Valiliyi kimi qurumlardan ibarət 50-yə qədər təmsilçi ilə iştirak edir.
Türkiyə Mədəniyyət və Turizm Nazirliyi builki sərgidə əl işləri, dijital yeniliklər və sənət nümunələri ilə iştirak edir. Belə ki, Türkiyənin yaşayan unikal və ənənəvi sənətlərindən olan Tokat əl yazmaları, İznik çini qabları və ebru sənətinin tanınmış ustaları tərəfindən onun necə hazırlandığı göstərilir. Sərgi ziyarətçiləri üçün türk xalq oyunları və rəqsləri də nümayiş olunur.