Qax, 15 noyabr, Mustafa Dadaşov, AZƏRTAC

Hər bir xalqın əsrlər boyu formalaşan dövlətçilik ənənələrinin, konkret dövlət modelinin gerçəkləşməsi üçün əlverişli siyasi mühit və milli iradə ilə yanaşı, güclü liderin də olması mühüm şərtdir. Bu bir tarixi həqiqətdir: güclü, qətiyyətli, vətənpərvər və müdrik lideri olmayan xalqı hətta real imkanlar da belə öz müstəqilliyinə qovuşdura bilmir. Xalqımızın əsrlər boyu həsrətində olduğu azadlıq, müstəqillik və milli dövlətçilik kimi ali məqsədlərinin gerçəkləşməsi üçün Tanrı Heydər Əliyev kimi bir dühanı Azərbaycan xalqına bəxş etdi. O dühanın işığında Azərbaycan nura qərq oldu.

Bu fikirləri AZƏRTAC-ın bölgə müxbirinə açıqlamasında Qax ziyalısı, rayonda çıxan “Şəlalə” qəzetinin redaktoru, “Tərəqqi” medallı jurnalist Xavər Əfəndiyeva söyləyib.

Müsahibimiz deyib: “Müasir dövlətçilik tariximiz məhz Heydər Əliyev dühasının çoxşaxəli və məhsuldar fəaliyyətinin şanlı salnaməsidir. Bu salnamənin hər sətrində Heydər Əliyev şəxsiyyətinin təntənəsi, böyüklüyü, aliliyi qəlblərə, ruhlara hakim kəsilir. Vətənini, xalqını sevən, “Mən azərbaycanlıyam” deyən hər kəs Heydər Əliyev sevgisinin, fəxarətinin qüruru ilə yaşayır və Ulu Öndərə olan böyük məhəbbətini bölüşmək istəyir. Elə mən də Azərbaycanın pənahı, milyonların gümanı, dünyanın heyran olduğu həmişəyaşar Liderimiz, Ulu Öndərimiz haqqında illər boyu ürəyimdə gəzdirdiyim sözləri demək istədim. Heydər Əliyev biz jurnalistlərin ən böyük dostu olub. İkinci dəfə hakimiyyətə qayıdan dahi şəxsiyyət əvvəlcə redaksiyaları çətin vəziyyətdən çıxarmaq üçün onların nəşriyyata olan borclarını sildi. Mətbuat orqanlarına tam müstəqillik verdi, mətbuat üzərində senzuranı ləğv etdi. Azərbaycan jurnalistikası Heydər Əliyev siyasətindən bəhrələndi. O çətin günlərimizdə jurnalistlərə arxa olan Ulu Öndərimizə hər birimiz minnətdarıq.

Onu da yaxşı bilirəm ki, Heydər Əliyev kimi dahi şəxsiyyət, qüdrətli Lider, dövlət başçısı haqqında danışmaq, söz demək olduqca çətin və məsuliyyətlidir. Lakin Ulu Öndərimizə olan sonsuz sevgimi, qəlbimdəki fəxarət və rəğbət hissini bölüşmək istədim...

Görkəmli dövlət xadimi, təcrübəli siyasətçi, Azərbaycan dövlətçiliyinin möhkəm təməlini qoyan, onu davamlı inkişaf yoluna çıxaran qüdrətli şəxsiyyət kimi Heydər Əliyevin həyat və fəaliyyəti müasir tariximizin mühüm mərhələsini təşkil edir. Nadir keyfiyyətlərə sahib olan Heydər Əliyev bir-biri ilə ziddiyyət təşkil edən iki müxtəlif ictimai-siyasi quruluşda ölkəyə inamla rəhbərlik etmiş, hər iki mərhələdə Azərbaycanın bir dövlət kimi güclənməsinə və tərəqqisinə çalışmış, xalqının mənafeyini hər zaman üstün tutmuşdur.

Ümummilli lider Heydər Əliyevin Azərbaycanı yüksəliş yoluna çıxaran inkişaf strategiyasının tarixi 1969-cu ildən, respublikamıza birinci dəfə rəhbərliyə gəlməsindən başlayıb. Ulu Öndərin rəhbərliyi ilə həmin dövrdə görülən işlər Azərbaycanda böyük sosial-iqtisadi, elmi və ədəbi-mədəni inkişafa yol açıb. Mübaliğəsiz deyə bilərik ki, Heydər Əliyevin ilk rəhbərliyi illərində Azərbaycan bütün sahələr üzrə, sözün əsl mənasında, intibah dövrünü yaşayıb. Məhz həmin dövrdən Azərbaycanın müasir tarixinin bütün mərhələləri Heydər Əliyevin adı ilə bağlıdır. Azərbaycan iqtisadiyyatının yenidən qurulması, SSRİ-nin məşhur ali məktəblərində gənclərimizin təhsil alması, respublikada hərbi liseyin yaradılması onun uzaqgörən siyasətinin nəticəsi, ölkəmizin gələcək inkişafı üçün nəzərdə tutulmuş əvəzsiz addımlar idi.

XX əsrin sonlarında yenidən müstəqillik qazanmaq kimi tarixi fürsəti əldə edən Azərbaycan qısa vaxtdan sonra onun itirilməsi təhlükəsi ilə üzləşdi. Belə bir böhranlı vəziyyətdə - 1993-cü ilin iyununda təcrübəli siyasətçi, bacarıqlı dövlət xadimi Heydər Əliyevin xalqın təkidli tələbi ilə hakimiyyətə gəlişi ölkədəki hərc-mərcliyə, vətəndaş qarşıdurmasına son qoydu, dövlət müstəqilliyimiz qorundu. Ulu Öndərin əsasını qoyduğu milli qurtuluş fəlsəfəsi, sözün həqiqi mənasında, müstəqil Azərbaycanın mövcudluğunu təmin etdi. Ümummilli Liderin uzaqgörənliyinin, qətiyyətinin nəticəsi olan “Əsrin müqaviləsi” imzalandı, islahatlar həyata keçirildi. Bu xətt ölkəmizdə indi də uğurla davam etdirilir.

Ulu Öndər tərəfindən müəyyənləşdirilmiş inkişaf strategiyasının əsasını iqtisadiyyatın yüksəlişi, mövcud resurslardan səmərəli istifadə, dünya iqtisadiyyatına inteqrasiya və nəticə etibarilə vətəndaşların rifah halının yüksəldilməsinə hesablanan sosialyönümlü bazar iqtisadiyyatının yaradılması təşkil edirdi.

Bütövlükdə, Heydər Əliyev müasir, müstəqil Azərbaycan dövlətçiliyinin etibarlı bünövrəsini yaratdı. Böyük Öndərin dövlətçilik konsepsiyası Azərbaycanın tarixi ənənələrini və müasir Avropa dəyərlərini özündə birləşdirən yeni inkişaf modeli oldu. Məhz bunun nəticəsidir ki, Azərbaycan iqtisadiyyatla yanaşı, demokratikləşmə, vətəndaş cəmiyyəti quruculuğu, insan hüquq və azadlıqlarının təminatı sahəsində də ciddi uğurlar əldə etdi.

Azərbaycanın iqtisadi möcüzələr ölkəsi kimi tanınması, müxtəlif mədəniyyətlərin, sivilizasiyaların qovuşduğu məkanda yerləşən ölkə olaraq beynəlxalq tədbirlərə ev sahibliyi etməsi əsası ulu öndər Heydər Əliyev tərəfindən qoyulan düzgün siyasətin nəticəsidir.

Heydər Əliyevin Vətən və xalq qarşısında misilsiz xidmətlərindən biri də milli dövlətçiliyimizin möhkəmləndirilməsi baxımından həyati əhəmiyyət kəsb edən azərbaycançılıq ideologiyasını formalaşdırması və onun bütün dünyada Azərbaycan diasporlarının ideoloji təməlinə çevrilməsidir. Heydər Əliyevin hakimiyyətə qayıdışından sonra Azərbaycanda əldə edilmiş milli birlik respublikamızın ən qiymətli mənəvi sərvətidir. Bu birlik 2020-ci ildə, 44 günlük Vətən müharibəsində öz həqiqi təsdiqini tapdı və uzun illər həsrətində olduğumuz Qələbə sevincini hər birimizə yaşatdı.

Bu gün Azərbaycanın hər bir uğurunun əsasında Heydər Əliyev uzaqgörənliyi, düşünülmüş siyasəti dayanır. Prezident İlham Əliyev ölkəmizin ötən dövrdə qazandığı uğurlardan bəhs edərkən demişdir: “Bu gün Heydər Əliyev siyasəti bütövlükdə bütün sahələrdə davam etdirilir. 2003-cü ildə Azərbaycan xalqı mənə böyük etimad göstərərək Prezident vəzifəsinə seçdiyi gündən bu günə qədər bu siyasətə sadiqəm. Mən 2003-cü ildə bu barədə sözümü demişəm. Mən bu siyasətə sadiq qalacağam və 2003-cü ildən bu günə qədər Azərbaycanda gedən uğurlu inkişaf Heydər Əliyev siyasətinin təntənəsidir, müstəqil Azərbaycanın təntənəsidir”.

Müasir, müstəqil Azərbaycanın memarı ulu öndər Heydər Əliyevin dövlətçilik ideologiyasından, dünyamiqyaslı siyasətçi olmasından, tarixi şəxsiyyət kimi tanınmasından nə qədər danışsaq bitib tükənməz.

...Ulu Öndəri mənə daha doğma, əziz edən onun mənəvi zənginliyi, sadəliyi, insanlara səmimi münasibəti, milli-mənəvi dəyərlərimizin daşıyıcısı və qoruyucusu olmasıdır. Deyin, hansımız bu dahi şəxsiyyətin söylədiyi “Azərbaycan” şeirini dinləyəndə qəhərdən kövrəlməmişik? Onun səsinin titrəməsi, gözlərinin dolması doğma Vətəninə - Azərbaycana olan böyük məhəbbətinin nişanəsi idi. Bu, həm də Vətən sevgisinin əzəmətinin, qürurunun təntənəsi idi. Xarici səfərlərinin birində azərbaycanlılarla görüşdüyü zaman Heydər Əliyevin ifa etdiyi “Qarabağın maralı” mahnısı yəqin çoxlarının yadındadır. Bu da milli mədəniyyətimizə vurğunluğun bir ifadəsi idi. Heydər Əliyev kimi tarixi şəxsiyyətin tez-tez uşaq evlərinə baş çəkməsi, atasız-anasız böyüyən körpələri bağrına basıb, oxşaması insanlığın ən ali göstəricisi idi. Tez-tez sadə əmək adamları, incəsənət ustaları ilə görüşləri də çoxlarına örnək ola biləcək mənəvi dəyərlərdəndir. Azərbaycanda böyükdən-kiçiyə hamı onun səmimiyyətinə, sadəliyinə vurğun idi. Ətrafındakı insanlarla isti münasibəti onu hər kəsə doğmalaşdırmışdı. Elə buna görə də hamı ona “Heydər baba” deyə müraciət edirdi.

Fenomenal yaddaşa malik olan Heydər Əliyev haqqında düşünərkən insanı heyrət və təəccüb bürüyür: Görəsən, bir insan bu qədər məlumatlı olmağı necə bacarıb? Bütün sahələrin bilicisi idi Ulu Öndər. Çox düşünmüşəm, dünyada ona bənzər daha bir kimsə varmı? Gəldiyim qənaət isə belə olub: Heydər Əliyev Tanrının bəşəriyyətə bəxş etdiyi ən böyük qüdrətli və ləyaqətli şəxsiyyət idi. Bəlkə elə buna görədir Ulu Öndərə tükənməyən el məhəbbəti, sevgisi. Heydər Əliyev qüdrətli dövlət başçısı, dünyamiqyaslı tanınmış siyasətçi, xalqını, Vətənini sevən sadə və səmimi bir insan idi.

AZƏRTAC-ın 2004-cü ildə nəşr etdiyi “Dünyanı heyran qoyan insan” kitabında xalqımızın dahi oğlu barədə toplanmış materiallarla hətta ötəri tanışlıq zamanı rast gəldiyim “Heydər Əliyev Azərbaycanı dünyaya tanıtmışdır”, “Heydər Əliyev Mərkəzi Asiyanın Corc Vaşinqtonudur”, “Heydər Əliyev siyasət şahmatının ustasıdır”, “Heydər Əliyev hər bir millətin şərəfi ola bilərdi” və sair deyimləri son dərəcə dərin məmnunluq hissi ilə oxuyur və Atatürk, Corc Vaşinqton, Cəvahirləl Nehru, Şarl de-Qoll kimi nadir tarixi simalar sırasında adı çəkilən Böyük Azərbaycanlı ilə fəxr edirəm.

Adını qürur və iftixarla andığım Ulu Öndəri yaxından görmədiyimə çox təəssüf edirəm. Lakin onun Azərbaycana rəhbərlik etdiyi dövrlərdə rayonumuzda həyata keçirilən böyük quruculuq işlərinin şahidiyəm. Ümummilli Liderin rəhbərliyinin birinci dövründə doğma Qaxımızda gedən tikinti-quruculuq, abadlıq işləri, yaradılan yeni iş yerləri insanlarda yaşamaq, yaratmaq eşqini artırmışdı. İlk dəfə rayonumuzda çoxmərtəbəli yaşayış evləri, istehsal sahələri, təmir-tikinti idarələri, müasir tipli məktəb və xəstəxana binaları, məişət obyektləri Qaxın görünüşünü və əhalinin rifah halını kökündən dəyişmişdi.

Bu gün də doğma Qaxımızda görülən hər işdə Heydər Əliyev ənənələrinin şahidi oluruq. Ölkəmizdə ardıcıl həyata keçirilən regionların sosial-iqtisadi İnkişafına dair Dövlət proqramları Heydər Əliyevin sosial-iqtisadi siyasətinin davamıdır. Bu proqramlarda nəzərdə tutulan bir çox infrastruktur layihələrdən rayonumuz da bəhrələnib.

Ulu öndər Heydər Əliyevin xalqına, xalqın isə Ümummilli Liderinə olan sarsılmaz inamı və sonsuz sevgisi belə bir aforizm yaradıb: Heydər-Xalq, Xalq-Heydər! Əslində, bu ifadə özündə bəlkə də bəşər tarixində indiyədək mövcud olmuş ən möhkəm və sarsılmaz xalq-rəhbər birliyini təcəssüm etdirir. Heç bir şübhə yoxdur ki, Azərbaycanın öz ərazi bütövlüyünün bərpasındakı möhtəşəm Qələbəsi, bu gün də davam edən və gündən-günə daha da möhkəmlənən bu vəhdətin növbəti təntənəsidir. Azərbaycan xalqı öz xilaskar oğlu Heydər Əliyevin əziz xatirəsini daim yaşadacaq. Azərbaycan dahi şəxsiyyətin siyasi varisi, layiqli davamçısı Prezident İlham Əliyevin rəhbərliyi ilə Ulu Öndərin müəyyənləşdirdiyi yolla bundan sonra da daha böyük qələbələrə doğru inamla addımlayacaq.