Qəbələ Dövlət Peşə Təhsil Mərkəzində “Açıq qapı” günləri təşkil olunacaq
Qəbələ, 25 iyul, Mustafa Dadaşov, AZƏRTAC
İyulun 28-dən 30-dək Qəbələ Dövlət Peşə Təhsil Mərkəzində “Açıq qapı” günləri təşkil olunacaq. Məqsəd gəncləri mərkəzin fəaliyyəti və burada tədris olunan peşə ixtisasları barədə məlumatlandırmaqdır. İştirakçılar, həmçinin işəgötürən şirkətlər haqqında məlumat da əldə edəcəklər.
Bu barədə AZƏRTAC-ın bölgə müxbirinə Peşə Təhsil Mərkəzinin direktoru Qalib Nəbiyev məlumat verib.
Direktor bildirib ki, tədbir çərçivəsində Mərkəzin ərazisində infotur təşkil olunacaq. “Açıq qapı” günlərinin iştirakçıları tədris ocağındakı emalatxanalar, dəzgahlar, sinif otaqları ilə tanış olmaq imkanı əldə edəcəklər. Eyni zamanda, işəgötürən təşkilatların mütəxəssisləri tərəfindən növbəti tədris ilində nəzərdə tutulan peşə ixtisasları, həmçinin yüksək texniki peşə (subbakalavr) ixtisasları üzrə təqdimatların keçirilməsi də nəzərdə tutulur. Tədbir zəruri sosial davranış və sanitar epidemioloji qaydalara, metodiki göstərişlərə uyğun həyata keçiriləcək.
Bölmənin digər xəbərləri
