Qəbələyə 6 ay ərzində 15 mindən artıq turist gəlmişdir
Qəbələ, 20 iyun (AZƏRTAC). Dağlıq ərazidə yerləşən Qəbələnin yaşıl sıx meşələri, gözəl mənzərəli yerləri, sərin bulaqları, qədim tarixi abidələri, müasir turizm obyektləri, gursulu dağ çayları və səfalı yaylaqları turistlərin yüksək marağına səbəb olur. Rayon mədəniyyət və turizm şöbəsinin müdiri Nargilə Qafarova AZƏRTAC-a bildirmişdir ki, iyunun 15-də Qəbələ rayonunda turizm mövsümünə rəsmən start verilsə də artıq mayın ortalarından başlayaraq turistlər Qəbələyə intensiv şəkildə gəlirlər. İstirahət etmək üçün Qəbələyə gələn yerli və xarici turistlərin sayının ildən-ilə artdığını bildirən şöbə müdiri hazırda Qəbələdə irili-xırdalı 100-dən artıq turizm obyektinin fəaliyyət göstərdiyini qeyd etmişdir.
Son 7 il ərzində Qəbələdə müasir turizm obyektlərinin sayı 5 dəfə artaraq 16-a çatmışdır. Gün ərzində bu obyektlərdə ümumilikdə 2500-ə yaxın qonağa restoran və hotel xidmətlərinin, eləcə də meşə gəzintisi, atla gəzinti, balıq ovu, qayıqla göldə gəzinti, rayonun görməli yerlərinə və tarixi abidələrinə səyahət xidmətlərinin göstərilməsi üçün imkanlar mövcuddur.
Ötən il Qəbələyə 30 min 150 turist gəlmişdirsə, təkcə bu il yanvarın 1-dən iyunun 15-dək, yəni turizm mövsümünün başlandığı dövrədək rayona gələn qonaqların sayı 15 mini keçmişdir. Xatırladaq ki, 2008-ci ildə Qəbələyə 14 min 630 turist, 2009-cu ildə 29 min 480 turist gəlmişdi.
Bölmənin digər xəbərləri
