Qeysər Nəvvab: Pakistan-Azərbaycan dostluğu zamanla güclənən qardaşlıq nümunəsidir
Bakı, 24 fevral, AZƏRTAC
Pakistan və Azərbaycan arasındakı əlaqələr sarsılmaz dostluq, qarşılıqlı hörmət və ortaq strateji maraqlar əsasında qurulub. Tarixi, mədəni və iqtisadi bağlılıqlara söykənən bu münasibətlər illər ərzində daha da möhkəmlənib və müxtəlif sahələri əhatə edən əməkdaşlıqla genişlənib. Baş nazir Şahbaz Şərifin Azərbaycana səfərləri bu dostluğun əhəmiyyətini bir daha vurğulayaraq, iki ölkə arasında dərin köklərə malik tərəfdaşlığın davam etdiyini göstərir.
Bu sözləri AZƏRTAC-a açıqlamasında Pakistan Gənclər Hərəkatının lideri (QHT forumu) Qeysər Nəvvab söyləyib.
O bildirib ki, Pakistan 1991-ci ildə Azərbaycanın müstəqilliyini tanıyan ilk ölkələrdən biri olub. O vaxtdan bəri iki dövlət müxtəlif beynəlxalq platformalarda bir-birini dəstəkləyərək güclü diplomatik əlaqələr qurub. Bu qarşılıqlı diplomatik dəstək zaman keçdikcə daha da möhkəmlənərək etimad və dostluq təməli yaradıb. İllər ərzində keçirilən yüksəksəviyyəli görüşlər və strateji dialoqlar bu münasibətlərin daha da güclənməsinə səbəb olub. Baş nazir Şahbaz Şərifin son səfəri iki ölkənin münasibətləri genişləndirmək və yeni əməkdaşlıq yollarını araşdırmaq öhdəliyini bir daha təsdiqləyir. Belə səfərlər təkcə mövcud əlaqələri möhkəmləndirmir, həm də mühüm məsələlərin müzakirəsi, yeni sazişlərin imzalanması və gələcək strateji istiqamətlərin müəyyənləşdirilməsi üçün əhəmiyyətli imkanlar yaradır.
İqtisadi əlaqələrin Pakistan-Azərbaycan münasibətlərinin əsas sütunlarından biri olduğunu deyən Pakistan Gənclər Hərəkatının lideri deyib: “Ölkələrimiz arasındakı ticarət əlaqələri dinamik inkişaf edir, hər iki tərəf yeni bazarlar və imkanlar araşdırmağa can atır. Baş nazir Şahbaz Şərifin səfəri çərçivəsində təşkil olunan Pakistan-Azərbaycan Biznes Forumu birbaşa bu sahədə münasibətlərin qurulmasının vacibliyini vurğulayır. Bu təşəbbüs özəl sektorun fəal iştirakını təmin edərək ticarət dövriyyəsinin artmasına və qarşılıqlı investisiyaların güclənməsinə töhfə verəcək”.
Enerji sektorunun da, həmçinin iki ölkə arasında mühüm əməkdaşlıq sahəsi olduğunu qeyd edən Qeysər Nəvvab deyib: “Səfər zamanı iki ölkənin hökumətləri arasında müxtəlif iqtisadi sahələri əhatə edən anlaşma memorandumları imzalanıb. Bu sazişlər əməkdaşlığa strukturlaşdırılmış yanaşma təmin edərək hər iki tərəfə uzunmüddətli iqtisadi faydalar qazandıracaq.
Pakistan və Azərbaycan arasında müdafiə sahəsində tərəfdaşlıq da son illərdə nəzərəçarpacaq şəkildə güclənib. Bundan əlavə, hərbi təcrübə mübadiləsi, təlim proqramları və birgə manevrlər regional təhlükəsizlik və sabitliyə müsbət töhfə verir. Mədəni əlaqələr Pakistan-Azərbaycan münasibətlərinin ayrılmaz hissəsidir. Hər iki xalq İslam irsinə malikdir. Mədəni mübadilənin genişləndirilməsi xalqlar arasında daha yaxın əlaqələrin qurulmasına xidmət edir. Mədəniyyət festivalları, tələbə mübadiləsi proqramları və turizmin təşviqi kimi müxtəlif təşəbbüslər qarşılıqlı anlayışı və hörməti gücləndirir.
Pakistan-Azərbaycan Məzunları Assosiasiyasının (PAAA) prezidenti kimi akademik əməkdaşlığın ikitərəfli əlaqələrin güclənməsində oynadığı rolu yaxından izləyirəm. Bir çox azərbaycanlı tələbə Pakistanda təhsil alır və eyni zamanda, pakistanlı tələbələr də Azərbaycanda akademik imkanlardan faydalanırlar. Universitetlər arasında əməkdaşlıq sayəsində birgə tədqiqatlar, professor-müəllim heyəti mübadiləsi və təqaüd proqramları həyata keçirilir ki, bu da gənc nəslin inkişafına böyük töhfə verir. Pakistan-Azərbaycan münasibətlərinin gələcəyi ümidverici görünür, çünki hər iki ölkə əməkdaşlıq üçün yeni sahələr araşdırmağa davam edir. İnformasiya texnologiyaları, bərpaolunan enerji və rəqəmsal iqtisadiyyat sahələri qarşılıqlı maraq doğuran istiqamətlərdir. Azərbaycanın texnologiya və infrastruktur sahəsindəki irəliləyişi Pakistanın rəqəmsal transformasiya və innovasiya hədəfləri ilə üst-üstə düşür”.
Qeysər Nəvvab diqqətə çatdırıb ki, turizm də böyük potensiala malik sahələrdən biridir. Azərbaycanın möhtəşəm təbiəti, tarixi abidələri və zəngin mədəniyyəti pakistanlı turistlər üçün cəlbedici məkan təəssüratı yaradır. Eyni zamanda, Pakistanın füsunkar mənzərələri və şimal bölgələrinin ecazkar təbiəti azərbaycanlı səyahətçiləri cəlb edə bilər. Turizm sahəsində əməkdaşlığın gücləndirilməsi həm iqtisadi inkişafa töhfə verəcək, həm də mədəniyyətlərarası mübadiləni artıracaq. Gənclərin ikitərəfli münasibətlərdə rolu da getdikcə artır. Bacarıqların inkişafı, sahibkarlıq və liderlik təlimlərinə yönəlmiş proqramlar gənclərə iqtisadi və sosial tərəqqiyə töhfə vermək imkanı yaradır. Pakistan və Azərbaycan gənclərin rəhbərlik etdiyi təşəbbüsləri dəstəkləməklə uzunmüddətli strateji tərəfdaşlıqlarını daha da möhkəmləndirə bilərlər.
“Pakistan-Azərbaycan dostluğu, sadəcə, diplomatik əlaqələrdən ibarət deyil. Bu, ortaq dəyərlərə, qarşılıqlı hörmətə və ümumi firavanlıq üçün eyni baxışa əsaslanan qardaşlıq münasibətidir. Baş nazir Şahbaz Şərifin Azərbaycana səfəri iki ölkənin müxtəlif sahələrdə əməkdaşlıq qurmaq əzmini bir daha təsdiqləyir. Artan ticarət əlaqələri, strateji müdafiə tərəfdaşlığı və dərinləşən mədəni münasibətlər bu dostluğun möhkəmlənməsinə xidmət edir. Bu yüksəksəviyyəli səfərlərin yaratdığı impulsdan maksimum istifadə etmək vacibdir. Daha sıx iqtisadi inteqrasiya, müdafiə sahəsində əməkdaşlığın dərinləşdirilməsi və təhsil-mədəniyyət sahələrində mübadilənin artırılması ilə Pakistan və Azərbaycan ikitərəfli münasibətlərdə yeni mərhələlərə çata bilər”, - deyə Gənclər Hərəkatının lideri vurğulayıb.
Bölmənin digər xəbərləri
