Qlazqo və Aberdində soydaşlarımız üçün ilk dəfə səyyar konsulluq xidmətləri göstəriləcək
London, 14 may, AZƏRTAC
Azərbaycan Respublikasının Londondakı səfirliyi tərəfindən Birləşmiş Krallığın Şotlandiya bölgəsində yaşayan soydaşlarımız üçün yeni təşəbbüs həyata keçirilir.
AZƏRTAC xəbər verir ki, konsulluq xidmətlərini vətəndaşlar üçün daha əlçatan etmək məqsədilə mayın 17-də Qlazqo, mayın 18-də isə Aberdin şəhərlərində ilk dəfə səyyar konsulluq xidməti təşkil olunacaq. Səyyar konsulluq xidməti zamanı vətəndaşlar pasportların verilməsi və ya dəyişdirilməsi, Azərbaycan Respublikasına qayıdış şəhadətnamələrinin rəsmiləşdirilməsi, vətəndaşlıq məsələləri, uşaqların doğumunun qeydiyyatı, müxtəlif arayışların verilməsi və konsulluq qeydiyyatı kimi xidmətlərdən faydalana biləcəklər. Həmçinin konsulluq-hüquq məsələləri ilə bağlı sualların cavablandırılması da nəzərdə tutulur.
Qlazqodakı xidmət şənbə günü saat 10:00-dan 16:00-dək “Novotel Glasgow Centre” otelinin “Lighthouse Room” zalında (181 Pitt street, Glasgow, G2 4DT), Aberdindəki xidmət isə bazar günü saat 11:00-dan 17:00-dək “Station Hotel”dəki “Kincardine Room” zalında (78 Guild Street, Aberdeen, AB11 6GN) həyata keçiriləcək.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
