RAMAZAN AYINDA MÜSƏLMANLARA QARŞI AKSİYALAR İSLAMA NİFRƏTİN TƏZAHÜRÜDÜR

30.09.2006 [21:47]
Çap et
A⁺ A^-

Müqəddəs Ramazan ayının ilk günlərində açıq-aşkar müsəlmanlara qarşı yönəldilmiş aksiyalar onlara nifrətin təzahürüdür və bu, hüquq mühafizə orqanlarının diqqətini cəlb etməlidir. AZƏRTAC Rusiya Müftiləri Şurasının saytına istinadla xəbər verir ki, Rusiya İctimai Palatası tolerantlıq və ictimai həmrəylik komissiyasının növbəti iclasının iştirakçıları belə qənaətə gəlmişlər.

Müftilər Şurasının sədri demişdir: “Gənclərin belə hərəkətləri, adətən, adi savadsızlıqdan, öz ölkəsinin tarixindən və Rusiyamızda müxtəlif dinlərə etiqad edən millətlərin və xalqların minilliklər boyu dinc yanaşı yaşamasından bixəbər olmalarından irəli gəlir. Dövlətimizin ixtilaflar və dağıntılar girdabına düşməsinin qarşısını almağın yeganə yolu maariflənmək, bütün müasir informasiya vasitələrindən istifadə etmək və mənəviyyatı zənginləşdirməkdir”.

O, din qardaşlarını təxribatlara uymamağa, toqquşmalardan çəkinməyə, ayıq-sayıq olmağa çağırmışdır.