Raul Hüseynov: Həvəskar videodan böyük səhnəyə aparan yol
Bakı, 23 sentyabr, Günel Alıyeva, AZƏRTAC
AZƏRTAC Azərbaycanın istedadları ilə müsahibələr silsiləsini davam etdirir. Daha bir müsahibimiz Raul Hüseynovdur. Onun cəmi 11 yaşı var, amma artıq üç ildir ki, Azərbaycanın Əməkdar artisti Aybəniz Həşimovanın rəhbərliyi altında məşq edir, çoxlarının çətin və uzun hesab etdiyi yolda inamla addımlayır. Raulun adı təsadüfi həvəskar videosunun sosial mediada sürətlə yayılması və buradakı ifasının milyonlarla baxış toplaması ilə məşhurlaşıb.
Musiqi fəaliyyətinin başlanğıcı
Raul deyir: “Düşünürəm ki, mən bu sevgi ilə doğulmuşam. Sözün əsl mənasında yuxuya getdim və musiqi ilə oyandım”.
Müsahibimiz qeyd edir ki, o, iki yaşından muğam dinləməyə, xalq melodiyalarına meyil etməyə başlayıb. Onun istedadını ilk dəfə anası Elvira Məmmədova görüb; övladını tez-tez lentə alır və ondan yeni mahnılar oxumasını xahiş edirdi.
Raul xatırlayır: “Bir gün “Məşədi İbad” mahnısını zümzümə edirdim, süzgəc də mənim üçün sanki nağara aləti idi. Anama təklif etdim ki, sadəcə “ailə arxivi” üçün bu ifamı lentə alsın. Video altı ay qaldı, sonra anam onu nəhayət ki, internetdə paylaşdı. Səhəri gün oyandıq ki, videoya təqribən 5 milyon baxış olub! Həmin andan hər şey dəyişdi: çəkilişlərə və müsahibələrə dəvət almağa başladım”.
Səhnəyə aparan yol
Elvira xanım oğlunun musiqiyə olan böyük sevgisini görəndən sonra onu İncəsənət Akademiyasına yazdırıb və artıq üç ildir ki, Əməkdar artist Aybəniz Həşimovadan dərs alır.
Oğlan minnətdarlıqla deyir: “Anam həmişə mənim ən böyük dəstəkçim olub. O, heç vaxt ruhdan düşməyimə icazə verməyib. Onu da qeyd etmək istərdim ki, musiqiyə olan sevgim motivasiya tələb etmir - bu, mənim daxilimdədir. Sadəcə, çox çalışıram və zəhmətimin öz bəhrəsini verəcəyinə inanıram”.
Raulun kumirləri və ilhamvericiləri
Kumirlərinə gəlincə, Raul onu ruhlandıran və yaradıcılığı ilə musiqisevərlər nəsilləri yetişdirən şəxsiyyətlərin adlarını hörmətlə sadalayır: “Şövkət Ələkbərova, Müslüm Maqomayev və Rəşid Behbudov, onlar mənim sevimli ifaçılarımdır. Təbii ki, müəllimim Aybəniz Haşımova və böyük xanəndə Arif Babayev”.
O əlavə edir ki, ən çox retro bəstələri ifa etməkdən həzz alır və tez-tez Arif Babayevin ifasında “Arif təsnifi”nə qulaq asır. İstedadlı oğlan onu da qeyd edir ki, çıxışlardan əvvəl həmişə vokal məşqləri edir, çünki bu, ona diqqətini cəmləməyə və köklənməyə kömək edir.
Qorxuya qalib gəlmək
Raul bir neçə dəfə Beynəlxalq Muğam Mərkəzi və Rəşid Behbudov adına Mahnı Teatrının səhnələrində çıxış edib. Amma bir epizod onun yaddaşında qalıb və həmin anı xəfif təbəssümlə xatırlayır: “Sarı gəlin” mahnısını ifa etməli idim. Amma o qədər əsəbi halda olmuşam ki, səhnə arxasına qaçdım! Anam məni sözün əsl mənasında səhnəyə qaytardı və nəhayət, oxumağa başladım. Sonda ifa gözəl alındı və tamaşaçılar qorxduğumu hiss etmədilər”.
Xüsusi fəxr etdiyi nailiyyətləri arasında orkestr ilə “Sənsiz” romansının ifasını xatırlayan Raul etiraf edir ki, bu, onun üçün çox çətin, lakin vacib addım olub.
Gələcək haqqında danışmağa dəyər və gənc vokalçı bir anlıq düşüncələrə dalır, qarşısında hələ həyata keçiriləcək arzularını görür: “Prezidentimizin qarşısında çıxış etmək ən böyük arzumdur. Bu, mənim üçün böyük şərəf olardı”.
İstedadlı oğlan fəxrlə deyir ki, ulu babası peşəkar aşıq olub və bu sənəti başqalarına da öyrədib. Deyəsən, Raulun musiqiyə olan xüsusi, səmimi sevgisi də məhz ulu babasından miras qalıb.
Müsahibimizlə söhbət əsnasında başa düşürsən: bu oğlan üçün musiqi sadəcə həvəs deyil, onu irəli aparan, böyüməyə güc verən, yeni zirvələrə ruhlandıran arzudur.
Bölmənin digər xəbərləri
