Riad Qasımov: Bakı çox dinamik inkişaf edən meqapolisdir
Bakı, 27 fevral, AZƏRTAC
Bakı çox dinamik inkişaf edən meqapolisdir. Şəhər son illərdə böyük dəyişikliklərə məruz qalıb.
AZƏRTAC xəbər verir ki, bunu Azərbaycan Dövlət Şəhərsalma və Arxitektura Komitəsinin Bakı şəhəri üzrə Memarlıq və Şəhərsalma Baş İdarəsinin rəisi Riad Qasımov “Hərəkat” beynəlxalq daşınmaz əmlak sammitinin açılışında çıxışı zamanı deyib.
“Bilirsiniz ki, Bakı regionun ən qədim şəhərlərindən biridir. Ən qədim insan məskənləri bu bölgədə yerləşirdi. XIX əsrin sonlarında Bakıda neft bumu başladı və onun əsas memarlıq özəyi olan qalanın hüdudlarından kənara çıxan şəhərin sürətli inkişafı başlandı.
Şəhərin Baş planlarına uyğun olaraq paytaxtın formalaşması prosesini görə bilərsiniz. Bu günə qədər Bakı şəhərinin 6 baş planı var idi. Onlardan birincisi XIX əsrin sonlarında qəbul edilib. Sonuncu isə bir ildən çox əvvəl, 2023-cü il dekabrın 30-da təsdiq olunub. Siz cəmi 100 ildən bir qədər artıq müddətdə şəhərin necə böyüdüyünü görə bilərsiniz, o, praktiki olaraq bütün Abşeron yarımadası boyunca genişlənib və çox sürətlə inkişaf etməkdə davam edir. Təbii ki, şəhərin inkişafına ən böyük təkan müstəqilliyin əldə edilməsi və XXI əsrin əvvəllərində ölkəyə investisiya axını oldu. Neft sənayesinin çiçəklənməsi, turizmin inkişafı, yeni infrastrukturun yaradılması Bakının təkcə şəhərin özündə deyil, həm də onun hüdudlarından kənarda yaşamaq üçün əlverişli məkana çevrilməsinə səbəb olub. Göründüyü kimi, Azərbaycan müstəqillik əldə etdikdən sonra həyata keçirilən möhtəşəm layihələr təkcə şəhəri deyil, həm də memarlığı çox fəal şəkildə inkişaf etdirməyə şərait yaratdı. Heydər Əliyev Mərkəzi kimi gözəl binalar və memarlığın yeni tendensiyalarını əks etdirən digər tikililər yaranıb”, - deyə Riad Qasımov bildirib.
Baş İdarənin rəisi Bakının 12 inzibati rayondan ibarət olduğunu diqqətə çatdırıb və Azərbaycan paytaxtının Baş Planının icrası barədə ətraflı danışıb. O deyib: “Bakı şəhərinin Baş Planının dörd əsas prinsipi var. Bunlardan birincisi Dayanıqlı İnkişaf Məqsədləridir, biz hamımız onlarla tanışıq. Bu Planda prioritet kimi götürülən DİM prinsiplərinə uyğundur. İkinci prioritet şəhərin və ətraf mühitin regenerasiyasıdır. Hamımız bilirik ki, ekoloji tendensiyalar şəhərdə yaşıllığın mühafizəsi və ağacların sayının artırılması üzrə tədbirlərin həyata keçirilməsidir. Üçüncüsü, şəhərin memarlıq görünüşünə və tarixi irsinə qayğı göstərilməsidir. Dördüncüsü, şəhərin yeni iqtisadiyyatıdır”.
Riad Qasımov Bakıda hibrid yaşıl dəhlizlərin yaradılacağını da vurğulayıb. “Belə dəhlizlər yaxın məsafədə ictimai yaşıllığın sayını artırmaq və ağacların sayı az olan ərazilərdə yaşıllıq sahələrini genişləndirmək vasitəsidir”, - deyə R.Qasımov sözlərini yekunlaşdırıb.
Bölmənin digər xəbərləri
