İQTİSADİYYAT
“RİLİF” YENİ PROQRAMLAR HƏYATA KEÇİRMƏYİ PLANLAŞDIRIR
Amerikanın “Rilif intənəyşnl” beynəlxalq humanitar təşkilatı ölkəmizdəki fəaliyyəti dövründə 250 min məcburi köçkünə 8 milyon dollar məbləğində yardım göstərmişdir. Bu barədə baş nazirin müavini, Dövlətqaçqınkomun sədri Əli Həsənov təşkilatın baş ofisinin layihələr üzrə direktoru Piter Midveyi qəbul edərkən xəbər vermişdir.
Dövlətqaçqınkomun mətbuat xidmətindən AZƏRTAC-a bildirmişlər ki, Amerika hökumətinin, BMT-nin, YUNİSEF-in, “Ekson/Mobil” neft şirkətinin sponsorluq etdiyi bu yardım səhiyyə, qaçqınların yerləşdirilməsi və onların ərzaq məhsulları ilə təmin edilməsi proqramları üzrə verilmişdi. Əli Həsənov “Rilif” təşkilatını məcburi köçkünlərə yardım göstərilməsinə dair üzrə yeni layihələrin həyata keçirilməsində daha fəal olmağa cağıraraq demişdir ki, bu yardım iş yerlərinin və mikrokreditləşmənin yaradılmasına yönəldilə bilər ki, bu da dövlətin strateji planlarına uyğundur.
Piter Midveyin bildirdiyinə görə, təşkilat yaxın vaxtlarda Azərbaycanda təhsil, mədəniyyət sahələrində, o cümlədən məcburi köçkünlər üçün kitabxanalar, kompüter sinifləri yaratmaq üzrə layihələr həyata keçirməyi, habelə yoxsulluğun azaldılması çərçivəsində iş görməyi planlaşdırır.