Riqada Xocalı soyqırımının 22-ci ildönümünə həsr olunmuş bir sıra tədbirlər keçirilmişdir
Riqa, 27 fevral (AZƏRTAC). Azərbaycanın Latviyadakı səfirliyi Xocalı soyqırımı barədə məlumatın geniş ictimaiyyətə çatdırılması məqsədi ilə bu ölkədə bir sıra tədbirlər keçirmişdir.
Xəbər verildiyi kimi, fevralın 22-də Latviyada fəaliyyət göstərən “Ocaq” Azərbaycan Mədəniyyət Mərkəzində Xocalı soyqırımı qurbanlarının xatirəsinin anılması mərasimi keçirilmişdir. Tədbirdə Səfirliyin müşaviri Gəray Muradov, Diasporla İş üzrə Dövlət Komitəsinin əməkdaşı Fuad Kərimov, mərkəzin başçısı Roman Əliyev çıxış etmişlər. Latviya-Azərbaycan Gənclər Təşkilatının üzvləri improvizə edilmiş mini-tamaşa təqdim etmiş, Azərbaycanın Xocalı şəhəri sakinlərinin düz 22 il əvvəl üzləşdikləri dəhşətləri canlandırmışlar.
Fevralın 26-da Latviya Universiteti, Baltik Akademiyası, Ali Hüquqşünaslıq Məktəbi və Turiba Universitetində Xocalı qurbanlarının xatirəsinə həsr olunmuş aksiyalar keçirilmişdir. Ali məktəblərdə “Xocalıya ədalət” fotosərgiləri açılmış, monitorlarda Xocalı faciəsi qurbanlarının şəkilləri nümayiş etdirilmişdir. Azərbaycanlı gənclərin nümayəndələri latviyalı tələbələrə ermənilərin cinayətkar və təcavüzkar siyasəti nəticəsində XX əsrdə baş vermiş ən dəhşətli faciə barədə məlumat vermişlər.
Riqanın mərkəzi küçələrində saat 13.00-da başlayan dinc yürüş saat 15.00-da “Azadlıq” abidəsi qarşısında başa çatmışdır. Azərbaycanlı tələbələr 1992-ci il fevralın 25-dən 26-na keçən gecə ermənilərin törətdikləri vəhşiliklərdən söz açan bukletlər paylamışlar.
Elə həmin gün “Radisson Blu Hotel Latvija” otelində Xocalı soyqırımının 22-ci ildönümünə həsr olunmuş konfrans keçirilmişdir. Tədbirdə Latviya ictimaiyyətinin nümayəndələri, ABŞ-ın Filadelfiya şəhərindəki Templ Universitetinin (Pensilvaniya ştatı) professoru Qrek Stauffer, ekspertlər, Latviya-Azərbaycan Gənclər Təşkilatının üzvləri, xarici tələbələr, jurnalistlər iştirak etmişlər.
Xocalı faciəsi qurbanlarının xatirəsi bir dəqiqəlik sükutla anılmışdır.
Tədbirdə səfirliyin müşaviri Gəray Muradov çıxış edərək bildirmişdir ki, Xocalı faciəsi erməni faşistlərinin XX əsrdə törətdikləri ən dəhşətli cinayətdir. Diplomat bildirmişdir ki, Xocalı faciəsi barədə həqiqəti dünya ictimaiyyətinə çatdırmaq üçün Azərbaycan Prezidenti İlham Əliyevin rəhbərliyi ilə böyük iş görülmüşdür. G.Muradov diqqətə çatdırmışdır ki, 5 il əvvəl Dialoq və Əməkdaşlıq uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndirici Leyla Əliyevanın təşəbbüsü ilə “Xocalıya ədalət!” kampaniyası başlanmışdır. Dünyanın bir çox ölkələrində həyata keçirilən bu kampaniya Xocalı faciəsi barədə informasiyanın beynəlxalq ictimaiyyətə çatdırılmasında müstəsna rol oynayır. Diplomat demişdir ki, xarici ölkələrin bir çox parlamentləri Xocalıda erməni cəlladları tərəfindən törədilmiş soyqırımı aktını tanımışlar. O, Azərbaycan ərazilərinin tezliklə işğaldan azad ediləcəyinə əmin olduğunu bildirmişdir.
Latviyanın Azərbaycanlı Gənclər Təşkilatının sədri Kamal Hüseynov XX əsrin dəhşətli faciəsi - Xocalı soyqırımı barədə məlumat vermiş, Xocalı qadınlarının, qocalarının, uşaqlarının və müdafiəçilərinin qətlə yetirildiyi yerdə olmuş Fransa jurnalisti Jan İv Junenin sözlərini xatırlatmışdır: “Mən müharibələr, faşistlərin qəddarlığı barədə çox eşitmişəm, lakin 5-6 yaşlı uşaqları, günahsız dinc sakinləri öldürən ermənilər daha pisdir”.
Templ Universitetinin müəllimi Qrek Stauffer vurğulamışdır ki, Xocalı faciəsi barədə bütün Amerika bilməlidir. Federal səviyyədə qətnamə qəbul etmək lazımdır. Pensilvaniya ştatının ABŞ-ın Xocalı faciəsinə dair qətnamə qəbul edən 12-ci ştatı olması barədə məlumat verən Q.Stauffer bildirmişdir ki, Xocalı faciəsinin tanınması prosesi yetərincə intensiv xarakter alır.
Latviyanın Azərbaycanlı Gənclər Təşkilatının həmsədri, hüquqşünas Toğrul Quluzadə Xocalı faciəsinin beynəlxalq hüquqi aspektlərindən danışmışdır. Bir sıra beynəlxalq konvensiyalara əsaslanan T.Quluzadə Xocalıda törədilən cinayətlərlə bağlı beynəlxalq hüququn bəzi elementlərini diqqətə çatdırmışdır. O, Azərbaycanın Xocalı şəhərində soyqırımı faktının hüquqi və siyasi müstəvidə tanınmasına nail olmağın vacib olduğunu bildirmişdir.
Konfransın sonunda Heydər Əliyev Fondunun hazırladığı “Xocalı - bir şəhərin faciəsi” filmi nümayiş etdirilmişdir.
Qeyd edək ki, Yanis Reyersin başçılığı ilə Bakıda rəsmi səfərdə olan Latviya-Azərbaycan Parlamentlərarası Dostluq Qrupunun üzvləri Xocalı faciəsi qurbanlarının abidəsi qarşısına əklil qoymuşlar.
Nigar Cəfərli
AZƏRTAC-ın xüsusi müxbiri
Riqa
Bölmənin digər xəbərləri
