RUSİYA ŞİMALİ KOREYANIN NÜVƏ SINAQLARINI PİSLƏYİR
Rusiya Prezidenti Vladimir Putin oktyabrın 9-da hökumətin üzvləri ilə keçirilən müşavirədə demişdir ki, onun ölkəsi Koreya Xalq Demokratik Respublikasının bir gün əvvəl keçirdiyi yeraltı nüvə sınaqlarını pisləyir. KXDR-in Koreya yarımadasında nüvə silahı saxlanmaması probleminə dair danışıqlara qayıdacağına ümidvar olduğunu bildirən Prezident RF Xarici İşlər Nazirliyinə BMT-nin Təhlükəsizlik Şurasında müvafiq məsləhətləşmələr aparmağı tapşırmışdır.
RF XİN-in rəsmi bəyanatında deyilir: “Tələb edirik ki, KXDR nüvə silahının yayılmaması haqqında Müqavilə rejiminə qayıtmaq və altıtərəfli danışıqların yenidən başlanması sahəsində təxirəsalınmaz addımlar atsın. Rusiya BMT TŞ-də məhz bu mövqelərdən çıxış edəcəkdir”. Bəyanatda bildirilir ki, Rusiya XİN cəlb olunmuş bütün dövlətləri bu mürəkkəb vəziyyətdə təmkin və dözüm nümayiş etdirməyə çağırır. Vurğulanmışdır ki, Rusiya dəfələrlə bildirmişdir ki, belə addım Koreya yarımadasında mövcud problemlərin kəskinləşməsinə gətirib çıxara bilər ki, bu da regionda sülh, təhlükəsizlik, sabitlik üçün qorxuludur, nüvə silahının yayılmaması haqqında rejimi sarsıtmaqdır.
Bölmənin digər xəbərləri
