Moskva, 22 iyun, AZƏRTAC

Rusiyanın tanınmış siyasətçiləri və ictimai xadimləri AZƏRTAC-a müsahibələrində birinci Avropa Oyunlarının açılış mərasimi və Rusiya-Azərbaycan münasibətlərinin hazırkı vəziyyəti barədə təəssüratlarından danışıblar.

Moskva Dövlət Beynəlxalq Münasibətlər İnstitutunun (MDBMİ) rektoru Anatoli Torkunov Bakıda Avropa Oyunlarının təşkilinə, Azərbaycanın idmançıları və qonaqları necə qəbul etdiyinə heyran qaldığını bildirib. Onun fikrincə, bu idman hadisəsi Azərbaycanın iri beynəlxalq tədbirləri təşkil etmək imkanını, bacarığını və məharətini bir daha vurğulayıb. MDBMİ-nin rektoru deyib: “Biz “Eurovision” müsabiqəsini yaxşı xatırlayırıq. O da böyük heyranlıq doğurmuşdu. Rusiya-Azərbaycan münasibətlərinin daha dinamik inkişaf etməsi üçün bütün şərtlər var və maraqlarımız üst-üstə düşür. Ən başlıcası isə vahid mədəni kodumuz var. Biz uzun illər bir yerdə yaşamışıq və özümüzü doğma insanlar kimi hiss edirik. Hər birimizin Azərbaycanda və Rusiyada çoxlu dostları var. Əminəm ki, münasibətlərimiz müvəffəqiyyətlə inkişaf edəcək”.

Rusiya Federasiyası Hökuməti sədrinin müavini Arkadi Dvorkoviç vurğulayıb: “Bakıda birinci Avropa Oyunlarının açılışı möhtəşəm bayram olub. Oyunlar böyük müvəffəqiyyətlə keçir. Rusiya idmançıları hələlik irəlidədirlər. Azərbaycanlı dostlarımız idmanın bir çox növlərində uğurla rəqabət aparırlar. Hamınızı gözəl idman bayramı münasibətilə təbrik edirəm. Rusiya-Azərbaycan münasibətləri həm siyasi, həm də iqtisadi sahələrdə çox yüksək səviyyədədir. Zənnimcə, yaxın vaxtlarda biz hər iki ölkənin bütün potensialını reallaşdıra biləcəyik”.

İnquşetiyanın rəhbəri Yunusbek Yevkurov: “Əvvəlcə inquş xalqı adından və şəxsən öz adımdan qardaş Azərbaycan xalqına və görkəmli lideriniz İlham Heydər oğlu Əliyevə ən xoş arzularımızı çatdırmaq istəyirəm. Mən Avropa Oyunlarının açılışında iştirak edən adamlarla söhbət etmişəm. Deməliyəm ki, onlar bu tədbiri son dərəcə yüksək qiymətləndiriblər. Mən buna şübhə etmirdim, başqa cür ola da bilməzdi, çünki Azərbaycan postsovet məkanının ən dinamik inkişaf edən ölkələrindən biridir. Mən bir neçə dəfə Azərbaycanda olmuşam və ölkənizin necə inkişaf etdiyini görmüşəm. Gözəl diyarınıza uğurlar və firavanlıq arzu edirəm”.

RF-nin rabitə və kütləvi kommunikasiyalar naziri Nikolay Nikiforov deyib: “Bakıda birinci Avropa Oyunlarının açılışı dünya idmanında yeni mərhələdir. Arzu edirəm ki, bu cür tədbirlər ölkənizdə tez-tez keçirilsin, çünki belə tədbirlər həqiqətən əlamətdar hadisədir, cəmiyyət, dünya birliyi tərəfindən müsbət qəbul olunur. Rusiya ilə Azərbaycan rabitə sahəsində əsasını qoyduqları regional birlik məkanında fəal əməkdaşlıq edirlər. Rabitənin coğrafi məhdudiyyəti yoxdur. Buna görə də biz mehriban qonşuluq rejimində transsərhəd qərarlar qəbul etməyə, yerüstü, kosmik məsələləri, tezliklərdən istifadə məsələlərini razılaşdırmalı oluruq. Biz qarşılıqlı anlaşma ruhunda işləyirik. Dekabr ayında Bakıda “Bakutel” sərgisi keçiriləcək. Ümidvaram ki, Rusiya şirkətlərinin təmsil olunacağı həmin sərgiyə mən də qatılacağam”.

Rusiyanın təbii sərvətlər və ekologiya naziri Sergey Donskoy: “Mən Bakıda birinci Avropa Oyunlarının keçirilməsini çox müsbət qiymətləndirirəm. Avropanın bütün ölkələrinin Oyunlarda iştirak etməsi artıq müsbət nəticədir. Azərbaycanla əməkdaşlıq Rusiyanın siyasətində mühüm beynəlxalq istiqamətdir. Hesab edirəm ki, inkişafda olan idman əməkdaşlığına hərtərəfli dəstək göstərməliyik”.

TASS agentliyi baş direktorunun birinci müavini Mixail Qusman: “Mən beş Olimpiya Oyunlarının açılışında olmuşam. Buna görə də Bakıdakı Oyunların açılışına xüsusi maraq və həyəcanla tamaşa etdim. Mən idman bayramının siması olan açılış mərasiminin fərəhləndirici olması, ölkəmiz Azərbaycanın cəlbedici və parlaq obrazının canlanması üçün Təşkilat Komitəsinin bu Oyunlara necə hazırlaşdığını, bunun üçün nə qədər güc, enerji və yaradıcılıq sərf etdiyini bilirəm. Mənə belə gəlir ki, bütün bunlar lazımi səviyyədə yerinə yetirildi. Bu mərasimi hazırlayan hər kəs, ilk növbədə Təşkilat Komitəsinin rəhbəri, Azərbaycanın birinci xanımı Mehriban Əliyeva fəxr edə bilərlər. Tamaşaçıların aldığı müsbət enerji heç vaxt unudulmayacaq”.

Rusiyanın təhsil və elm naziri Dmitri Livanov: “Çox parlaq açılış mərasimi idi. Azərbaycan qonaqları ənənəvi qonaqpərvərliklə qəbul edir və buna görə çox sağ olsun. Rusiyalı idmançıların uğuru çox sevindirir. Onların arasında çoxlu tələbə var. Komanda qayıdandan sonra onlarla görüşməyi və uğurları münasibətilə təbrik etməyi planlaşdırıram. Rusiya ilə Azərbaycanı ənənəvi səmimi münasibətlər bağlayır. Bizim orta məktəb, ali məktəb, elmi institutlar səviyyəsində çoxlu ikitərəfli əlaqələrimiz var. Biz bu əlaqələri dəstəkləyirik. Hesab edirəm ki, ölkələrimizin elm və təhsil sahəsində əməkdaşlığının böyük gələcəyi var. Şadıq ki, bizim aparıcı institutlarımız Azərbaycan üçün maraq doğurur. Bakıda M.V.Lomonosov adına Moskva Dövlət Universitetinin filialı uğurla fəaliyyət göstərir. Tezliklə İ.M.Seçenov adına Birinci Moskva Dövlət Tibb Universitetinin filialı açılacaq. Biz Rusiyanın aparıcı ali məktəblərinin Azərbaycandakı fəaliyyətinə bundan sonra da dəstək göstərəcəyik. Azərbaycanlı tələbələri də Rusiyanın universitet mərkəzlərində görməyə şadıq”.

Rusiyalı dirijor, Xalq Artisti Valeri Gergiyev: “Birinci Avropa Oyunlarının çox gözəl səviyyədə təşkilinə görə Azərbaycanın bütün sakinlərini təbrik edirəm. Həm Rusiya, həm də Azərbaycan idmançıları gözəl çıxış edirlər. Bakı dünyanın idman paytaxtlarından biri olub. Sonuncu dəfə Bakıda 2008-ci ildə böyük Azərbaycan bəstəkarı, dostum Arif Məlikovun yubileyində olmuşam. Ümidvaram ki, ən yaxın zamanda Mariya Teatrı və Anna Netrepko ilə birlikdə Azərbaycanın paytaxtına qastrola gələcəyik”.

Ulyanov vilayətinin qubernatoru Sergey Morozov: “Mən Avropa Oyunlarının açılışına böyük maraqla tamaşa etdim. Yarışlara televiziya ilə baxıram. Etiraf edim ki, Oyunların açılışına gəlib baxmaq imkanımın olmamasına görə təəssüflənirəm. Amma Ulyanovskda idman tədbirlərinin təşkili ilə məşğul olan bütün məmurların bu Oyunların açılışına ustad dərs kimi baxmalarını təşkil etmişəm. Azərbaycanlılar gözəl xalqdır, onlar birinci olmağa layiqdirlər. Mən sizinlə fəxr edirəm və ümidvaram ki, avqustda ailəmlə birlikdə Bakıya gəlib, Olimpiya obyektlərini əyani görə biləcəyəm”.

Fəridə Abdullayeva

AZƏRTAC -ın xüsusi müxbiri

Moskva