SİYASƏT
Şahbuz Rayon Maliyyə Şöbəsi və Statistika İdarəsi üçün yeni bina istifadəyə verilib
![](/files/galleryphoto/2022/3/1200x630/16661067535415045177_1200x630.jpg)
![](/files/galleryphoto/2022/3/1200x630/16661067533458144969_1200x630.jpg)
![](/files/galleryphoto/2022/3/1200x630/1666106753874045121_1200x630.jpg)
![](/files/galleryphoto/2022/3/1200x630/16661067535153113031_1200x630.jpg)
![](/files/galleryphoto/2022/3/1200x630/1666106753725349724_1200x630.jpg)
![](/files/galleryphoto/2022/3/1200x630/16661067536747778_1200x630.jpg)
Şahbuz, 18 oktyabr, AZƏRTAC
Azərbaycan Respublikasının Prezidenti cənab İlham Əliyev deyib: “Biz inamla irəliyə gedirik. İrəliyə getmək üçün bizim yolumuz açıqdır. Bu yolun təməlini Ulu Öndər qoymuşdur. Bir daha demək istəyirəm ki, biz bu siyasətə sadiqik. Bizim yolumuz müstəqillik, milli ləyaqət, inkişaf, tərəqqi yoludur. Bizi bu yoldan heç kim döndərə bilməz”. Bu gün dövlət başçısının rəhbərliyi ilə müstəqil Azərbaycan və onun Naxçıvan Muxtar Respublikası davamlı inkişaf və tərəqqi dövrünü yaşayır. Sabitlik və sürətli sosial-iqtisadi inkişaf, aparılan genişmiqyaslı quruculuq işləri, açılan yeni iş yerləri, istehsal və xidmət sahələrinin yaradılması dövlət müstəqilliyinin bəhrələridir.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, oktyabrın 18-də - Müstəqilliyin Bərpası Günündə Şahbuz Rayon Maliyyə Şöbəsi və Statistika İdarəsi üçün yeni inzibati bina istifadəyə verilib.
Naxçıvan Muxtar Respublikası Ali Məclisinin Sədri Vasif Talıbov yaradılan şəraitlə tanış olub.
Naxçıvan Muxtar Respublikasının maliyyə naziri Rəfael Əliyev çıxış edərək maliyyə orqanlarının fəaliyyəti üçün yaradılan şəraitə görə nazirliyin kollektivi adından minnətdarlıq edib.
Naxçıvan Muxtar Respublikası Ali Məclisinin Sədri Vasif Talıbov Şahbuz Rayon Maliyyə Şöbəsi və Statistika İdarəsi üçün yeni inzibati binanın istifadəyə verilməsi münasibətilə kollektivləri təbrik edib, fəaliyyətlərində uğurlar arzulayıb.
Şahbuz Rayon Statistika İdarəsinin əməkdaşı Aytən Rüstəmli kollektiv adından minnətdarlıq edib.
Məlumat verilib ki, zirzəmi ilə birlikdə 3 mərtəbədən ibarət olan binanın 2 girişi vardır. Şahbuz Rayon Maliyyə Şöbəsi üçün binada 17 iş otağı, server, kombi və elektrik otağı, bufet nəzərdə tutulub. Binada şöbə əməkdaşlarının hər biri üçün ayrıca otaq, eləcə də qəbul otağı, əməliyyatların operativliyini təmin etmək üçün xəzinə əməliyyatı otağı, arxiv vardır. Şahbuz Rayon Statistika İdarəsi üçün isə 7 iş otağı ayrılıb.
Şahbuz Rayon Maliyyə Şöbəsi və Statistika İdarəsi ilə aid nazirlik və komitə arasında fasiləsiz elektron əlaqə təmin edilib.
Naxçıvan Muxtar Respublikası dövlət statistika komitəsinin sədri Vaqif Rəsulov yaradılan şəraitə görə Ali Məclisin Sədrinə minnətdarlıq edib.
Binanın həyətində yaşıllaşdırma işləri aparılıb, su və işıqlandırma sistemləri qurulub.
Şahbuz şəhərində Mərasim evi istifadəyə verilib
Muxtar respublikada xalqımızın qədim adət-ənənələrinin, milli-mənəvi dəyərlərinin qorunub yaşadılmasına xüsusi diqqət yetirilir. Məscid və mərasim evlərinin inşası da görülən bu işlərin tərkib hissəsi kimi mühüm əhəmiyyətə malikdir.
Oktyabrın 18-də Şahbuz şəhərində Mərasim evi istifadəyə verilib.
Naxçıvan Muxtar Respublikası Ali Məclisinin Sədri Vasif Talıbov binada yaradılan şəraitlə tanış olub.
Məlumat verilib ki, 104 yerlik Mərasim evi zal, 2 mətbəx və kombi otağından ibarətdir. Mərasim evi Şahbuz şəhər bələdiyyəsinin balansındadır. Bina istilik və soyutma sistemləri ilə təchiz edilib, mətbəxdə mebel quraşdırılaraq lazımi avadanlıqlar qoyulub, həyət abadlaşdırılıb.
Şahbuz bələdiyyəsinin sədri İlham Qəhrəmanov Şahbuz şəhərində əlamətdar gündə mərasim evinin istifadəyə verilməsinin sakinlər tərəfindən minnətdarlıqla qarşılandığını bildirib.
Ali Məclisin Sədri qurulanların qorunması barədə tapşırıqlar verib.
Şahbuz şəhərində məktəbdənkənar təhsil müəssisələri üçün yeni bina inşa olunur
Həmin gün Naxçıvan Muxtar Respublikası Ali Məclisinin Sədri Vasif Talıbov Şahbuz şəhərində məktəbdənkənar təhsil müəssisələri üçün inşa olunan binanın layihəsinə baxıb, tikinti işləri ilə də maraqlanıb.
Məlumat verilib ki, zirzəmi ilə birlikdə 4 mərtəbədən ibarət olacaq binada dəmir-beton işləri yekunlaşdırılıb. Tikinti işləri yekunlaşdıqdan sonra binada Uşaq-Gənclər Yaradıcılıq Mərkəzi, Texniki Yaradıcılıq Mərkəzi və Turist-Diyarşünaslıq Mərkəzinin fəaliyyəti üçün şərait yaradılacaqdır.
Ali Məclisin Sədri tikinti işlərinin gedişi ilə bağlı müvafiq tapşırıqlar verib.