“Şahdağ” doğma meydanda “Bakı”ya qalib gəldi
Qusar, 24 mart, Elxan Yusifli, AZƏRTAC
Martın 24-də futbol üzrə Azərbaycan birinci divizionunda XIX turun ilk görüşləri keçirilib.
AZƏRTAC xəbər verir ki, Şövkət Orduxanov adına Qusar şəhər stadionunda yerli “Şahdağ” klubu “Bakı” komandası ilə qarşılaşıb. Üç qolun vurulduğu görüş qusarlıların qələbəsi ilə başa çatıb.
Gərgin keçən oyunun ilk hissəsində meydan sahibləri hesabı açıblar. Matçın 35-ci dəqiqəsində David Çaçkunaşvili fərqlənib. İkinci hissə başlayan kimi meydan sahibləri yenidən irəli atılıblar. Matçın 57-ci dəqiqəsində Sərxan Ağayevin qolu yerli azarkeşləri sevindirib. “Bakı” futbolçuları çox çalışsalar da qollardan yanız birinin əvəzini çıxmağı bacarıblar. Oyunun 76-ci dəqiqədə Nicat Süleymanov son nəticəni müəyyənləşdirən qolu qusarlıların qapısından keçirib. 2-1 hesabı ilə başa çatan matçdan sonra “Şahdağ” 21 xalla turnir cədvəlinin 11-ci pilləsində qərarlaşıb.
XIX turun bu gün keçirilən digər görüşlərində “Ağsu”-“Energetik” 3-0, “Şəmkir”-“Göyəzən” 1-0, “Turan Tovuz”-“Mil-Muğan” 0-0 hesabları qeydə alınıb.
Bölmənin digər xəbərləri
