Şamaxı rəsədxanasında yaradılan yeni şərait turistlərə ən yüksək səviyyədə xidmət göstərməyə imkan verəcəkdir
Bakı, 7 iyul (AZƏRTAC). Prezident İlham Əliyevin Azərbaycanda elmin inkişafına göstərdiyi diqqət sayəsində AMEA-nın N.Tusi adına Şamaxı Astrofizika Rəsədxanası da öz görkəmini dəyişir. Ölkə başçısının müvafiq sərəncamları əsasında ayrılmış vəsait hesabına burada irihəcmli işlər görülür.
Rəsədxanadan AZƏRTAC-a bildirmişlər ki, Şamaxıdan 22 kilometr şimalda, gözəl təbii iqlim şəraitinə malik ərazidə yerləşən bu elmi mərkəz nəinki yerli, beynəlxalq turizm üçün də yüksək potensiala malikdir. Təsadüfi deyil ki, hazırda ərazidə turist şəhərciyi salınır. Şəhərcikdə 10 birmərtəbəli və ikimərtəbəli kottec, 16 yerlik motel, 150 yerlik yeməkxana binası tikilir. Uşaq bağçasının, tibb məntəqəsinin və digər obyektlərin inşası da nəzərdə tutulmuşdur. Müasir kommunikasiya sistemləri və yaradılan şərait turistlərə ən yüksək səviyyədə xidmət göstərməyə imkan verəcəkdir.
Qeyd edək ki, Şamaxı Astrofizika Rəsədxanası 1966-cı ildən fəaliyyətə başlamışdır. Dəniz səviyyəsindən 1470 metr hündürlükdə, Pirqulu dağının zirvəsində yerləşən elmi mərkəz 25 hektar ərazini əhatə edir. Burada Almaniya istehsalı olan 6 teleskop vasitəsilə tədqiqatlar aparılır. Fəaliyyət göstərdiyi müddətdə rəsədxana nadir elmi tapıntılar, ixtiralarla dünya elminə maraqlı töhfələr vermişdir.
Bölmənin digər xəbərləri
