Şamaxı turistlər üçün cəlbedici məkana çevrilir
Şamaxı, 29 avqust (AZƏRTAC). Əsrarəngiz təbiəti, buz bulaqları, zəngin mətbəxi, tarix və mədəniyyət abidələri ilə diqqəti cəlb edən Şamaxıda istər yay, istərsə də qış turizmi üçün geniş imkanlar vardır.
Prezident İlham Əliyev tərəfindən 2011-ci ilin “Turizm ili” elan edilməsi bölgədə bu sahənin inkişafına geniş imkanlar yaratmışdır .
AZƏRTAC xəbər verir ki, hazırda rayonda turist marşrutlarının müəyyən edilməsi və hazırlanması, yol infrastrukturunun qurulması, turistlərə hər cür xidmətlərin göstərilməsi istiqamətində ciddi işlər görülür. İndi rayonda 24 mehmanxana və mehmanxana tipli turist obyekti mövcuddur. Rayonun Dədəgünəş kəndi yaxınlığındakı “Göy qurşağı”, Şərədil kəndinin ərazisindəki “Şərədil” istirahət mərkəzlərində bütün otaqlar, kotteclər Şərq və Avropa üslubunda qurulmuş, xidmətlər ən yüksək səviyyədə təşkil olunmuşdur.
İstirahət mərkəzlərində konfrans zalı, restoran və bar, sauna, süni göl, hovuz, sadə idman zalları, musiqiçilərdən ibarət qruplar fəaliyyət göstərir.
Təsadüfi deyildir ki, təkcə bu ilin yeddi ayında Şamaxıya 45 minə yaxın turist gəlmişdir. Bu, ötən ilin müvafiq dövrünün göstəricisindən çoxdur.
Hazırda “Şərədil” istirahət mərkəzində tikilən beşulduzlu otelin inşası başa çatmaq üzrədir. Şamaxı şəhərinin mərkəzindəki çoxmərtəbəli “Şamaxı” otelində isə əsaslı təmir və yenidənqurma işləri aparılır.
Bölmənin digər xəbərləri
