Səfir: İnsanlar istəyir ki, torpaq daha göz yaşı tökməsin, bağlar çiçəklənsin
Bakı, 26 fevral, AZƏRTAC
Dünya ictimaiyyəti 30 il ərzində erməni separatçılarının əməllərini kənardan izləyərək onları həvəsləndirib və faciənin miqyasına nəzər yetirmədən tərəflərə razılaşmağı təklif edib. Onlar üçün təcavüzkar və zərərçəkən anlayışı mövcud olmayıb, erməni tərəfini beynəlxalq hüquq normalarına hörmət etməyə məcbur etmək əvəzinə hər iki tərəfi bərabər tutublar. Nəticədə, Azərbaycan öz gücü hesabına beynəlxalq hüququn tələblərinə riayət etməyi təmin edib.
AZƏRTAC xəbər verir ki, bunu Azərbaycan Respublikasının Qırğızıstandakı fövqəladə və səlahiyyətli səfiri Lətif Qəndilov Xocalı soyqırımının 33-cü ildönümü ilə bağlı “Veçerniy Bişkek” qəzetinə müsahibəsində söyləyib.
“Ermənistan tərəfinin növbəti təxribatından sonra Azərbaycan xalqı 2020-ci ildə 44 günlük Vətən müharibəsində işğal olunmuş torpaqlarını azad edib. Bundan sonra üç il ərzində dəfələrlə Ermənistana sülh müqaviləsi bağlamağı və Azərbaycan ərazisindən ordusunu çıxarmağı təklif edib. Lakin erməni qüvvələri Azərbaycan ərazisinə daxil olmağa, hərbçilərini yerləşdirməyə və əraziləri minalamağa davam edirdilər. Bu səbəbdən 2023-cü il 19-20 sentyabr tarixində Azərbaycan öz ərazisini erməni silahlı qüvvələrindən təmizləmək məqsədilə bir günlük antiterror əməliyyatı keçirməyə məcbur qalıb”, - deyə diplomat bildirib.
L.Qəndilov qeyd edib ki, bu il matəm tədbirləri ikinci ildir ki, işğaldan azad edilmiş torpaqlarda, o cümlədən də kütləvi məzarlıqlar aşkar edilən Xocalıda keçirilir. İnsan qalıqları əsasən qadın və uşaqlara məxsusdur. Qurbanların əksəriyyətinin qollarının bağlı olması və işgəncələrə məruz qalaraq qətlə yetirilməsi, erməni separatçılarının azərbaycanlılara qarşı nifrət və soyqırımı siyasətinin bariz sübutudur.
“Müharibə və dəhşətli acıya baxmayaraq, Azərbaycan xalqının həyat və Vətən sevgisi qalib gəlir. Azərbaycanda olarkən bunun şahidi oldum”, - deyə “Veçerniy Bişkek” qəzetinin müxbiri qeyd edib.
“Bəli, hər bir halda son hədəf alternativi olmayan sülhün əldə olunmasıdır. Azərbaycan xalqı davamlı və uzunmüddətli sülhə köklənib. İnsanlar istəyir ki, torpaq daha göz yaşı tökməsin, bağlar çiçəklənsin. Ancaq Xocalı faciəsinin acısı Azərbaycan xalqının qəlbində daim qalacaq. Biz bu faciəni unutsaq, yenidən təkrar olunması ilə üz-üzə qala bilərik”, - deyə səfir vurğulayıb.
Bölmənin digər xəbərləri
