Şəhid polkovnik Füzuli Cavadovun xatirəsi anılıb
Bakı, 17 dekabr, AZƏRTAC
Şəhid polkovnik Füzuli Cavadovun xatirəsinə həsr olunmuş tədbir keçirilib.
AZƏRTAC xəbər verir ki, Zirə Mədəniyyət Mərkəzinin Eko-Parkında keçirilən tədbirdə Xəzər Rayon İcra Hakimiyyətinin başçısı Elşən Salahov, şəhid Füzuli Cavadovun ailə üzvləri, hüquq-mühafizə orqanlarının və rayonun idarə, müəssisə və təşkilatlarının rəhbərləri, rayon ictimaiyyətinin nümayəndələri, şəhid ailələrinin üzvləri, qazilər və məktəblilər iştirak ediblər.
Tədbir Azərbaycan Respublikasının Dövlət Himninin səsləndirilməsi və ölkəmizin ərazi bütövlüyü, suverenliyi naminə canını qurban vermiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Çıxış edən Elşən Salahov şanlı Zəfər yolundan danışaraq, vətən uğrunda canlarını fəda edən şəhidlərimizin hər zaman qəlbimizdə əbədi yaşayacağını, onların adlarının daim uca tutulacağını vurğulayıb.
Mərasimin aparıcısı Azərbaycan Yazıçılar Birliyinin katibi İlqar Fəhmi polkovnik Füzuli Cavadovun keçdiyi həyat yolundan, vətənə xidmətindən danışaraq, onun şeirə, poeziyaya olan sevgisini vurğulayıb.
Sonra tədbirdə məclisi-üns təşkil olunub və kəndin ziyalıları tərəfindən şeirlər səsləndirilib.
Tədbir Füzuli Cavadovun xatirəsinə həsr olunmuş “Komandir” adlı sənədli filmin nümayişi ilə davam edib. Filmdə şəhidin ailə üzvləri, dostları və silahdaşları onunla bağlı xatirələrini bölüşüblər.
Sonda filmin yaradıcı heyəti - ssenari müəllifi Ülviyyə Tahirqızı, rejissoru Hüseyn Kazımov və redaktoru İlqar Rəsul filmin ərsəyə gəlməsindən danışaraq bu işdə onlara dəstək olan hər kəsə öz təşəkkürlərini bildiriblər.
Bölmənin digər xəbərləri
