Səsi ilə qəlblərə toxunan balaca istedad - Nuray Şahsuvarlını tanıyaq VİDEO
Bakı, 2 oktyabr, Gülay Nəzərova, AZƏRTAC
Bəzən bir səs insanı uzağa aparır, unudulmaz sənətkarları yada salır. O səs qəlbin dərinliklərinə işləyir, dinləyicini həm kövrəldir, həm də qürurlandırır. Əslən laçınlı olan Nuray Şahsuvarlının səsi də belədir – onu böyük sənətkar Şövkət Ələkbərovaya bənzədirlər. Dinləyicilər bu oxşarlıqda bir tərəfdən nostaljini, milli musiqimizin klassik ruhunu, digər tərəfdən isə bu balaca istedadın yeni nəfəsini və fərqli baxışını hiss edirlər.
Onun məlahətli səsi ilə ifa etdiyi mahnılar sosial şəbəkələrdə paylaşılıb və geniş maraq doğurub. Yaşının az olmasına baxmayaraq, Nuray istedadını parlaq şəkildə nümayiş etdirir və dinləyicilərin rəğbətini qazanır. AZƏRTAC onu oxuculara daha yaxından tanıdır.
On iki yaşlı Nuray Şahsuvarlı Sumqayıt şəhəri İsmət Qayıbov adına 1 nömrəli tam orta məktəbin 8-ci sinif şagirdidir. Bununla yanaşı, Bülbül adına 2 nömrəli Uşaq İncəsənət Məktəbində xanəndəlik üzrə oxuyub, hazırda isə fortepiano üzrə təhsil alır. O, ailəsinin dəstəyi ilə ifaçılıq sənətində özünü daha da təkmilləşdirir. Dərslərini yaxşı oxuyur, məktəbdə keçirilən tədbirlərdə çıxış edir. Musiqi onun üçün artıq sadəcə hobbi deyil, həyatının ayrılmaz bir hissəsidir.
Nurayın musiqiyə marağı çox kiçik yaşlarından başlayıb. O, anasının ifa etdiyi “Kukla” mahnısına böyük maraq göstərirmiş. Ritm duyumu və melodiyaya marağı onun musiqi istedadını erkən yaşlardan üzə çıxarıb.
Bu balaca ifaçını geniş auditoriyaya ilk dəfə tanıdan “Böyük dayaq” filmində Flora Kərimovanın səsləndirdiyi “Pərişanın mahnı”sını ifa etməsi olub. Anası onun oxumağını sosial şəbəkədə paylaşıb və qısa müddət sonra yayılmağa başlayıb. Dinləyicilər çox bəyəniblər, təriflər və müsbət rəylər Nurayın həvəsini daha da artırıb.
Qarabağ haqqında xatirələr dinləyərək böyüyən Nuray deyir: “Ailəm bu bölgənin tarixi, gözəllikləri və mədəniyyəti haqqında çox danışıb, mənə Qarabağ sevgisini aşılayıblar. Buna görə də ən böyük arzularımdan biri Qarabağda musiqi ifa etmək olub”. Bu arzu artıq reallaşıb – o, ötən il Şuşada keçirilən tədbirdə çıxış edib, dinləyicilərin qəlbinə yol tapıb. Gələcəkdə isə Laçın da daxil olmaqla, digər bölgələrdə çıxış etmək arzusundadır.
O hazırda müxtəlif tədbirlərdə və müsabiqələrdə fəal iştirak edir. Yaşının az olmasına baxmayaraq səhnədə özünü sınayıb, təcrübə qazanıb. Ümummilli Lider Heydər Əliyevin anadan olmasının 100 illiyi ilə bağlı keçirilən müsabiqədə iştirak edib. Ötən il isə Şuşada Uşaqların Beynəlxalq Müdafiəsi Günü münasibətilə “Şuşa türk xalqları birliyinin mədəniyyət incisidir” adlı beynəlxalq uşaq yaradıcılıq festivalında "Qarabağ şikəstəsi”ni səsləndirib. Tam orta məktəbdə və Uşaq İncəsənət Məktəbində aldığı təhsil, müəllimlərinin zəhməti və ailəsinin dəstəyi onun musiqi bacarıqlarını daha da gücləndirib.
Nuray həm də gələcəkdə tibb sahəsi üzrə təhsil almaq istəyir. Lakin musiqiyə olan sevgisi və səhnə həvəsi onu daim ifa etməyə səsləyir. Hər ifasında dinləyicilərin qəlbinə yol tapmaq onun üçün önəmlidir. Bu sevgi və həvəs balaca istedadı bacarıqlı musiqiçi kimi formalaşdırır. Məktəb həyatını və musiqi fəaliyyətini uğurla uzlaşdıran Nuray üçün hər yeni çıxış, hər yeni ifa gələcək yolun bir addımıdır.
Bundan əlavə, Nurayın qiraətçi olmaq həvəsi də var. O, klassik və müasir poeziya nümunələrini səsləndirməyi də xoşlayır.
Nuray uğurlarında müəllimlərinə minnətdar olduğunu deyir. Musiqi sahəsində ona düzgün repertuar seçən, yol göstərən və hər addımında dəstək olan müəllimi Əsgər İsmayılova, eyni zamanda, orta məktəbdə ona ana qayğısı göstərən müəllimləri Aygün İsmayılova və Könül Ələsgərovaya da dərin təşəkkürünü bildirir. Onların qayğısı və dəstəyi Nurayın həm dərslərini yaxşı oxumasına kömək olur, həm musiqiyə həvəsini artırır, həm də onu səhnədə daha inamlı edir.
Səsi, ifa bacarığı və çoxsahəli istedadı ilə musiqi sahəsində gələcəyin ümidverici ifaçılarından biri kimi seçilən Nuray, həm klassik muğam ənənələrinə hörmətlə yanaşır, həm də öz ifa tərzində fərdi toxunuşunu əlavə edərək dinləyiciləri heyran edir.
Bölmənin digər xəbərləri
