Seyid Yusuf Raza Gilani: Azərbaycanın Şanlı Zəfəri Pakistanda bayram əhvali-ruhiyyəsilə qarşılanıb
Bakı, 5 noyabr, AZƏRTAC
Azərbaycanın Pakistandakı səfirliyinin təşkilatçılığı ilə 8 Noyabr – Zəfər Gününün 5-ci ildönümü münasibətilə rəsmi qəbul təşkil edilib.
Səfirlikdən AZƏRTAC-a bildiriblər ki, Pakistanın Prezidenti vəzifəsini icra edən, Senatın sədri Seyid Yusuf Rza Gilaninin əsas qonaq qismində təşrif buyurduğu qəbulda federal nazirlər, senatorlar, Pakistan Silahlı Qüvvələrinin yüksəkrütbəli zabitləri, xarici ölkələrin Pakistandakı səfirləri, dövlət qurumlarının, ictimai, mədəni, işgüzar dairələrinin nümayəndələri, jurnalistlər, eləcə də Pakistanda yaşayan azərbaycanlılar iştirak ediblər.
Əvvəlcə 44 günlük Vətən müharibəsində şəhid olanların əziz xatirəsi bir dəqiqəlik sükutla yad edilib, Azərbaycan və Pakistanın Dövlət himnləri səsləndirilib və Şanlı Zəfərimizə həsr olunmuş videoçarx nümayiş etdirilib.
Səfir Xəzər Fərhadov Zəfər Günü haqqında ətraflı məlumat verərək bildirib ki, Ermənistanın işğalı altında olan torpaqlarımız 44 günlük Vətən müharibəsində Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə cəsur Azərbaycan Ordusu tərəfindən azad edilib və xalqımızın 30 illik həsrətinə son qoyulub.
Vurğulanıb ki, Ermənistan müharibə zamanı mülki şəxsləri hədəf alaraq Gəncə, Bərdə və Tərtər şəhərlərinə ağır artilleriya hücumları edib. Səfir bildirib ki, yüksək peşəkarlıq və qəhrəmanlıq nümayiş etdirən Azərbaycan Ordusu torpaqlarımızı azad edib, ölkəmiz BMT Təhlükəsizlik Şurasının müvafiq qətnamələrini icra edərək gecikmiş ədaləti bərqərar edib. X.Fərhadov 2023-cü ilin sentyabrında 23 saat ərzində keçirilmiş lokal xarakterli antiterror tədbirləri nəticəsində ölkənin suverenliyinin tam təmin edildiyini, Azərbaycan Bayrağının ölkəmizin bütün ərazisində qürurla dalğalandığını diqqətə çatdırıb.
Diplomat işğaldan azad edilmiş ərazilərdə həyata keçirilən bərpa və quruculuq işləri haqqında danışıb, “Böyük Qayıdış” Proqramının icra olunduğunu deyib.
O, müstəqilliyimizin ilk günlərindən etibarən Azərbaycana göstərdiyi dəstək və sarsılmaz həmrəyliyə görə Pakistana dərin təşəkkürlərini bildirib, bunun iki ölkə arasındakı qardaşlıq əlaqələrinin bariz nümunəsi olduğunu diqqətə çatdırıb.
Pakistanın Prezidenti vəzifəsini icra edən Seyid Yusuf Rza Gilani Azərbaycan hökuməti və xalqını Zəfər Gününün 5-ci ildönümü münasibətilə təbrik edib. O qeyd edib ki, İkinci Qarabağ müharibəsində qazanılan tarixi zəfər Azərbaycanın ərazi bütövlüyünün bərpası və BMT Təhlükəsizlik Şurasının müvafiq qətnamələrinin reallaşması ilə nəticələnib. Əlavə edib ki, ədalətin bərpası olan həmin Şanlı Qələbə bir milyona yaxın azərbaycanlının öz ata yurdlarına qayıtması üçün geniş imkanlar açıb.
Ermənistan işğalından azad edilmiş ərazilərdə həyata keçirilən genişmiqyaslı quruculuq işləri barədə danışan Seyid Yusuf Rza Gilani həmin fəaliyyətin bölgədə sülhün və tərəqqinin simvolu olduğunu vurğulayıb. O, Pakistanın Azərbaycanın beynəlxalq hüquqa əsaslanan haqlı mövqeyini daim dəstəklədiyini ifadə edərək, ölkəmizin Şanlı Zəfərinin Pakistan ictimaiyyəti arasında bayram əhvali-ruhiyyəsilə qarşılandığını deyib.
Tədbirdə Pakistan Silahlı Qüvvələri orkestrinin müşayiəti ilə Azərbaycan Müdafiə Nazirliyinin Əlahiddə Nümunəvi Orkestrinin solisti gizir Günay Qasımova və Həzi Aslanov adına Ordu İdeoloji Mədəniyyət Mərkəzinin solisti gizir Elçin Məmmədov vətənpərvərlik mövzusunda mahnılar ifa edib.
Bölmənin digər xəbərləri
