“Seysmik təhlükənin və riskin qiymətləndirilməsində yeni yanaşmalar” - Konfrans
Bakı, 15 may, AZƏRTAC
Mayın 15-də Fövqəladə Hallar Nazirliyi, Yeni Azərbaycan Partiyasının (YAP) Yasamal rayon təşkilatı, Yasamal Rayon İcra Hakimiyyəti və Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin birgə təşkilatçılığı ilə “Şəhərsalma və Memarlıq İli”nə həsr olunmuş “Seysmik təhlükənin və riskin qiymətləndirilməsində yeni yanaşmalar” mövzusunda konfrans keçirilib.
AZƏRTAC xəbər verir ki, YAP Yasamal rayon təşkilatında keçirilən tədbirdə müasir şəhərsalmada nəzərə alınmalı olan vacib faktorlar, eləcə də seysmik riskin qiymətləndirilməsi kimi məsələlər bu sahəyə məsul olan dövlət qurumlarının və elmi təşkilatların nümayəndələrinin iştirakı ilə müzakirə olunub.
Tədbirdə əvvəlcə Dövlət Himni səsləndirilib, ardınca Ulu Öndər Heydər Əliyevin və ərazi bütövlüyümüz və suverenliyimiz naminə canından keçən qəhrəmanların əziz xatirəsi bir dəqiqəlik sükutla yad edilib.
Bir neçə gün sonra ölkəmizin daha bir mötəbər tədbirə - Ümumdünya Şəhərsalma Forumunun On Üçüncü Sessiyasına (WUF13) ev sahibliyi edəcəyini diqqətə çatdıran YAP Yasamal rayon təşkilatının sədri Bəxtiyar Nəbiyev forumun Azərbaycanda keçirilməsinin dövlətimizə və onun rəhbərinə göstərilən hörmət və ehtiramının bariz nümunəsi olduğunu qeyd edib.
O, Ulu Öndər Heydər Əliyevin ölkəmizə rəhbərliyi illərində Azərbaycan memarlığına verdiyi töhfələrdən, memarlıq incilərinə göstərdiyi diqqətdən bəhs edib. Qeyd olunub ki, Ümummilli Liderin siyasi məktəbinin layiqli davamçısı Prezident İlham Əliyev tərəfindən bu istiqamətdə də işlər sürətlə həyata keçirilir. İşğaldan azad edilmiş ərazilərdə aparılan böyük quruculuq işlərindən söz açan Bəxtiyar Nəbiyev Birinci vitse-prezident Mehriban Əliyevanın rəhbərliyi ilə Heydər Əliyev Fondu tərəfindən mədəni irsin qorunması istiqamətində görülən işlərdən danışıb.
Daha sonra çıxış edən fövqəladə hallar nazirinin müavini Cəbrayıl Xanlarov ölkəmizin seysmik aktiv regionda yerləşdiyini vurğulayaraq həmin reallığın hər kəsi bina və qurğuların təhlükəsizliyinə, inşası, istismarı proseslərinə, ümumiyyətlə, tikinti və şəhərsalma fəaliyyətinə xüsusi məsuliyyətlə yanaşmağa məcbur etdiyini diqqətə çatdırıb: “Müasir şəhər yalnız estetik baxımdan deyil, həm də təhlükəsizlik, davamlılıq və fövqəladə hallara hazırlıq baxımından yüksək standartlara cavab verməlidir. Seysmik təhlükənin qiymətləndirilməsi artıq yalnız elmi-tədqiqat sahəsi deyil, eyni zamanda, dövlət təhlükəsizliyi, iqtisadi inkişaf və əhalinin rifahı ilə birbaşa bağlı strateji məsələdir. Şəhərsalma proseslərində risklərin, o cümlədən seysmik risklərin düzgün qiymətləndirilməsi və effektiv idarəolunması baş verə biləcək fəlakətin qarşısının alınmasında böyük rol oynayır. Bu istiqamətdə normativ-hüquqi bazanın təkmilləşdirilməsi, innovativ yanaşmaların və beynəlxalq standartların tətbiqi, tikinti obyektlərinin optimal konstruktiv həllər vasitəsilə seysmik dayanıqlılığının artırılması, elmi əsaslandırılmış qərarların qəbul edilməsi xüsusi əhəmiyyət daşıyır. Seysmik təhlükə və seysmik risk anlayışları ölkə hüdudlarını aşan və coğrafi bölgələri əhatə edən geniş anlayış olduğundan seysmik risklərin idarəolunmasında region ölkələri arasında qarşılıqlı informasiya mübadilə mexanizminin təsis olunmasını vacib edir”.
Respublika Seysmoloji Xidmət Mərkəzinin baş direktoru, AMEA-nın müxbir üzvü, professor Qurban Yetirmişli “Seysmik təhlükənin və riskin qiymətləndirilməsində yeni yanaşmalar” mövzusunda məruzə ilə çıxış edib, mərkəzin həyata keçirdiyi tədqiqatlar barədə ətraflı məlumat verib.
Milli Məclisin deputatı Aydın Mirzəzadə WUF13-ün Azərbaycanda keçirilməsinin ölkəmizin şəhərsalma, dayanıqlı inkişaf və müasir urbanizasiya sahəsində artan rolunun göstəricisi olduğunu bildirib. Deputatın sözlərinə görə, forum müxtəlif ölkələrdən mütəxəssisləri, memarları, şəhər planlaşdırıcılarını və dövlət nümayəndələrini bir araya gətirərək, şəhərlərin gələcəyi ilə bağlı mühüm məsələlərin müzakirəsinə şərait yaradacaq. Azərbaycanın belə bir tədbirə ev sahibliyi etməsi həm beynəlxalq etimadın göstəricisi, həm də ölkəmizin müasir şəhərsalma siyasətinə verdiyi önəmin təzahürüdür. Azərbaycanda memarlıq abidələrinin qorunması və bərpası istiqamətində mühüm işlər görüldüyünü diqqətə çatdıran A.Mirzəzadə müasir şəhərsalma ilə tarixi memarlığın harmoniyasının qorunmasının urbanizasiya prosesində vacib məsələlərdən hesab olunduğunu qeyd edib. O, şəhərləşmə prosesinin sürətlənməsi fonunda seysmik risklərin qiymətləndirilməsinin xüsusi aktuallıq kəsb etdiyini diqqətə çatdırıb.
Bölmənin digər xəbərləri
