Şimal-qərb bölgəsində baş vermiş dağıdıcı zəlzələdən üç ay ötür
Şəki-Zaqatala bölgəsi, 7 avqust (AZƏRTAC). Ölkənin şimal-qərb bölgəsində baş vermiş dağıdıcı zəlzələdən artıq üç ay vaxt keçir.
Xəbər verildiyi kimi, mayın 7-də və sonrakı günlərdə baş vermiş güclü yeraltı təkanlar nəticəsində Zaqatala, Balakən, Qax və Şəki rayonlarında minlərlə fərdi yaşayış evinə, xeyli sayda sosial təyinatlı obyektə, o cümlədən məktəb binalarına, uşaq bağçalarına ciddi ziyan dəymişdir.
Prezident İlham Əliyev zəlzələnin nəticələrinin aradan qaldırılması ilə bağlı görülən işlərlə yerində tanış olmaq məqsədilə mayın 9-da fəlakət bölgəsinə səfər etmiş, sakinlərlə görüşmüş, problemləri ilə maraqlanmış, təxirəsalınmaz tədbirlərin həyata keçirilməsi üçün aidiyyəti qurumların rəhbərlərinə konkret tapşırıqlarını vermişdir.
AZƏRTAC xəbər verir ki, dövlətimizin başçısının göstərişlərinə uyğun olaraq hazırda zəlzələdən zərər çəkmiş rayonlarda kompleks tədbirlər davam etdirilir.
Qax rayon fövqəladə hallar komissiyasından bildirmişlər ki, Fövqəladə Hallar Nazirliyinin (FHN) işçi qrupları tərəfindən bu günədək rayonda 2896 fərdi evə baxış keçirilmişdir. Monitorinqlər zamanı 329 evin tam qəzalı vəziyyətə düşdüyü, 485 evin bərpa və gücləndirməyə, 996 evin isə təmirə ehtiyacı olduğu müəyyənləşdirilmişdir. İndiyədək rayonun yaşayış məntəqələrində 268 fərdi ev sökülmüş, 243 evin tikintisinə başlanmışdır. Bundan əlavə, zəlzələ nəticəsində qəzalı vəziyyətə düşmüş 10 məktəb üçün də hazırda yeni binalar tikilir.
Zaqatala rayon fövqəladə hallar komissiyasından verilən məlumata görə, podratçı tikinti təşkilatları tərəfindən indiyədək rayonun zəlzələdən zərər çəkmiş yaşayış məntəqələrində 2186 fərdi ev sökülmüş, eyni zamanda, 910 evin tikintisinə başlanmışdır. Baş vermiş təbii fəlakət nəticəsində rayonda 20 məktəb binası qəzalı vəziyyətə düşmüşdür. Bu məktəblərdən 15-nin binası artıq sökülmüş, 11-də tikinti işlərinə başlanmışdır.
Balakən rayon fövqəladə hallar komissiyasından bildirmişlər ki, zəlzələ nəticəsində rayon ərazisində 218 fərdi ev tam qəzalı vəziyyətə düşmüşdür. Fərdi evlərin və məktəb binalarının tikintisi üçün podratçı tikinti təşkilatları tərəfindən bu günədək rayona 262 maşın mişar daşı gətirilmişdir. Hazırda 154 fərdi evdə tikinti işləri aparılır. Bundan əlavə, zəlzələ nəticəsində qəzalı vəziyyətə düşmüş Qarahacılı kənd tam orta məktəbi üçün 300, Püştətala kənd ibtidai məktəbi üçün isə 80 şagird yerlik yeni binaların tikintisinə başlanılmışdır. Gərəkli kəndində 8 mənzilli yaşayış evinin tikintisi də davam etdirilir. Katex kəndində qəzalı vəziyyətdə olan 1 nömrəli uşaq bağçasının binası da artıq sökülmüşdür.
Mayın 7-də baş vermiş zəlzələ nəticəsində Şəki şəhərində də 3 məktəb binası tam qəzalı vəziyyətə düşmüşdür. Hazırda 12 nömrəli məktəb üçün 500, 14 nömrəli məktəb üçün isə 360 şagird yerlik yeni binalar inşa edilir. 17 nömrəli məktəb üçün də tezliklə yeni binanın tikintisinə başlanılacaqdır.
Bölmənin digər xəbərləri
