Şimali Kiprdə Xocalı soyqırımı ilə bağlı konfrans keçiriləcək
Bakı, 22 fevral, AZƏRTAC
Xocalı soyqırımının 30-cu ildönümü ilə əlaqədar Şimali Kipr Türk Cümhuriyyətində (ŞKTC) beynəlxalq konfrans keçiriləcək.
AZƏRTAC Azərbaycan-Kipr Dostluq Cəmiyyətinə (AKDC) istinadla xəbər verir ki, fevralın 26-da keçiriləcək konfransda Şimali Kipr Türk Cümhuriyyətinin Prezidenti Ersin Tatar, dövlət rəsmiləri, deputatlar, azərbaycanlı və türk tələbələr, eləcə də ictimaiyyət və media nümayəndələri iştirak edəcəklər.
Girnə Amerikan Universitetinin konqres mərkəzində keçiriləcək konfransa Azərbaycan nümayəndə heyəti də qatılacaq.
Nümayəndə heyətinin Şimali Kipr Türk Cümhuriyyətinin Prezidenti Ersin Tatar, Baş nazir Faiz Sucuöğlu, hökumət üzvləri, ali təhsil ocaqlarının rəhbərləri və deputatlar ilə görüşləri də nəzərdə tutulub. Görüşlərdə iki ölkə arasında ictimai münasibətlərin qarşılıqlı inkişafı və xalqlarımız arasında işbirliyinin daha da gücləndirilməsi istiqamətində müzakirələr aparılacaq.
Səfər çərçivəsində Azərbaycan nümayəndə heyətinin üzvləri Savaş Muzeyi, Karaoğlanoğlu şəhidliyi və Açıq Hava Hərb Muzeyini də ziyarət edəcəklər.
Bölmənin digər xəbərləri
