Bakı, 10 iyun, AZƏRTAC

Somalidə “Əş-Şəbab” silahlılarının “Bearl Beach” hotelinə hücumu nəticəsində doqquz nəfər – altı dinc sakin və üç polis əməkdaşı həlak olub, on nəfər isə yaralanıb.

AZƏRTAC France-Presse agentliyinə istinadla xəbər verir ki, əməliyyat zamanı oteldə olan 84 nəfər xəsarət almadan xilas edilib.

İyunun 9-da axşam saatlarında silahlı şəxslər “Bearl Beach” hotelinə hücum edib və bir qrup insanı girov götürüb. Hadisə yerinə gələn xüsusi təyinatlı qüvvələr ikimərtəbəli otel binasına girib. Binanın daxilində intensiv atışma gedib və bütün silahlılar zərərsizləşdirilib.

Paytaxtın dəbdəbəli “Lido Beach” rayonunda, Türkiyə səfirliyi yaxınlığında yerləşən otel məmurlar, deputatlar və siyasətçilər arasında populyardır.