Sosial şəbəkələrdə məşhurlaşan qarmon ifaçısı: Toylara, el şənliklərinə də çağırırlar VİDEO
Lənkəran, 17 may, İlkin Adıyev, AZƏRTAC
Lənkəranın təbiət incisi sayılan Xanbulan bu dəfə yalnız gölü və çayı ilə deyil, insanın ruhuna toxunan musiqi sədaları ilə ziyarətçilərin qəlbini oxşayır. Bu musiqi sədalarının sahibi isə qarmon ifaçısı İqbal Novruzovdur.
AZƏRTAC-ın bölgə müxbiri xəbər verir ki, sosial şəbəkələrdə yayılan bir video İqbal Novruzovun həyatını tamamilə dəyişib. Onun qarmon ifa edərkən çəkilən videosu qısa zamanda minlərlə baxış toplayaraq sosial şəbəkələrdə böyük marağa səbəb olub. Ruh oxşayan ifası ilə insanların qəlbinə yol tapan musiqiçi indi artıq toylara, el şənliklərinə və müxtəlif tədbirlərə dəvət olunur. Onun ifası təkcə dinləyicilərin deyil, peşəkar musiqiçilərin də diqqətini çəkib.
Ən maraqlısı isə odur ki, İqbalın peşəkar musiqi təhsili yoxdur. O, cəmi bir neçə gün musiqi müəlliminin yanına gedib. Qalan bütün bacarıqlarını isə öz zəhməti, marağı və hissləri ilə formalaşdırıb. Bu gün ifa etdiyi hər bir melodiya təkcə notların birləşməsi deyil, həm də onun iç dünyasının, illərlə topladığı duyğuların səsi kimidir.
“Qarmonla tanışlığım uşaq yaşlarımdan başladı. Hər dəfə kiminsə bu alətdə ifa etdiyini eşidəndə qəribə bir duyğu yaşayırdım. Heç bir musiqi məktəbini bitirməmişəm. Düzü, imkanımız da olmayıb. Sadəcə cəmi 4 gün musiqi müəlliminin yanına getmişəm. O 4 gündə öyrəndiklərim mənə bir ömürlük yol göstərdi. Sonrasını isə özüm məşq etməklə, qulaq asmaqla, hiss etməklə öyrəndim. İndi toylara, el şənliklərinə çağırırlar. Sosial şəbəkədə bir gün Xanbulanda ifa etdiyim bir video paylaşıldı. O gündən sonra tanınmağa başladım. İnsanların sevgisi, xoş sözləri mənə həm ruh verir, həm də daha çox çalışmağa həvəs yaradır”, - deyə qarmon ifaçısı İqbal Novruzov bildirir.
Xanbulana yolu düşənlər onun ifasını canlı olaraq dinləmək şansını əldə edirlər. "Ağ Göyərçinim" və "Cavanlığım" kimi sevilən mahnıları qarmonla elə ustalıqla ifa edir ki, musiqi ilə təbiət sanki bir ahəngə çevrilir. Sakit göl, əsən meh və dağların qoynunda ucalan qarmon sədası burada istirahəti daha da yaddaqalan edir: "Ağ Göyərçinim", "Cavanlığım" – bu mahnılar mənim üçün çox dəyərlidir. Hər dəfə ifa edəndə öz keçmişimi, gəncliyimi, yaşadığım duyğuları xatırlayıram. Hiss edirəm ki, bu mahnılar təkcə mənim yox, dinləyənlərin də qəlbinə toxunur”.
Qarmon onun üçün sadəcə musiqi aləti deyil. İqbal Novruzov bu alətlə həm ailəsini dolandırır, həm də onun səsindən zövq aldığını deyir. Bəzən sakit bir yerdə, tək-tənha oturub ifa etdiyi zaman bütün dərdini, sevincini sanki qarmona danışır. “Təbiətin qoynunda, Xanbulan gölü, çayı, dağları arasında qarmonun səsi başqa cür gəlir. Sanki hər şey susur, bircə musiqi danışır”, - deyir həmsöhbətim.
İqbal Novruzovun həyat yolu bir çox musiqiçilərdən fərqlənir. O, heç bir peşəkar musiqi təhsili almadan illərdir ki, qarmon sənətini öz zəhməti ilə yaşadır. Musiqi onun üçün sadəcə sənət deyil, həm dolanışıq mənbəyi, həm də ruhun dili və həyatla əlaqəsini qoruyan sanki bir körpüdür.
Bölmənin digər xəbərləri
