SİYASƏT
SOYDAŞLARIMIZ AZƏRBAYCANLA BAĞLI MƏLUMATLARI “ÖLKƏM” JURNALINDA OXUYACAQLAR
AZƏRTAC xəbər verir ki, Xarici Ölkələrdə Yaşayan Azərbaycanlılarla İş üzrə Dövlət Komitəsi “Ölkəm” adlı yeni jurnal təsis etmişdir.
Bu dərgidə diasporumuzun fəaliyyətindən, müxtəlif ölkələrdəki diaspor təşkilatlarımızdan, Azərbaycanı dünyada tanıdan müxtəlif sənət sahiblərindən bəhs edən yazılar yer alacaqdır. “Ölkəm” jurnalı həm də xaricdə yaşayan soydaşlarımızı Azərbaycanda baş verən proseslərlə məlumatlandırmaqla yanaşı, onların Azərbaycan tarixini, mədəniyyətini, adət-ənənələrini, milli mətbəxini və s. unutmaması baxımından stolüstü vəsait kimi nəzərdə tutulmuşdur. Diasporumuzun bütün nümayəndələrinin maraqlarına cavab verəcək, xarici ölkələrdə fəaliyyət göstərən həftəsonu Azərbaycan məktəblərinin şagirdlərinin Vətən haqqında məlumatlandırılmasında, onlara azərbaycançılıq ideologiyasının aşılanmasında, Azərbaycan dili, tarixi və mədəniyyətinin öyrədilməsində də jurnalın xüsusi rolu olacaqdır.
2008-ci ilin ilk ayında çap olunan “Ölkəm” jurnalının birinci nömrəsində Azərbaycan Prezidenti İlham Əliyevin 31 dekabr - Dünya azərbaycanlılarının həmrəyliyi günü münasibətilə dünya azərbaycanlılarına müraciəti, ötən ilin noyabrında Bakıda keçirilmiş Türk dövlət və cəmiyyətlərin XI dostluq, qardaşlıq və əməkdaşlıq qurultayı, eləcə də ABŞ-dakı diasporumuzun fəaliyyəti haqqında yazılar dərc edilmişdir. Bundan başqa, ilk nömrədə Litvada yaşayan həmyerlimiz, rəssam Adilə Əfəndi, Macar-Azərbaycan Dostluq Cəmiyyətinin sədri Svetlana Abdullayeva və istedadlı pianoçu Murad Hüseynovla müsahibələr verilmişdir. Müxtəlif illərdə ayrı-ayrı mətbuat orqanlarında rus və Azərbaycan dillərində çap olunan, son illərə kimi “məxfi” qrifi altında arxivlərdə saxlanılan tarixi sənədlərlə “Şərhsiz” rubrikasında tanış olmaq mümkündür.
Jurnalda “İbrus” teatrının Marsel səhnəsindəki çıxışı haqqında məqalə, ictimai və şəxsi fəaliyyətindəki xidmətlərinə görə Fransanın “Chevalier de l’Ordre du Merite” ordeni ilə təltif olunan tanınmış fotoqraf, əslən azərbaycanlı Reza Deqqətinin çəkdiyi şəkillər və ölkəmizdə baş verən mühüm hadisələr barədə müxtəlif informasiyalar da vardır.