SOYQIRIM VƏ ETNİK TƏMİZLƏMƏ AKTLARINA QARŞI BEYNƏLXALQ MÜBARİZƏ DİQQƏT MƏRKƏZİNDƏ OLMUŞDUR

31.01.2004 [20:19]
Çap et
A⁺ A^-

AZƏRTAC-ın Almaniyadakı xüsusi müxbiri xəbər verir ki, Stokholmda “Soyqırımları, kütləvi qırğınlar və etnik təmizləmələr” mövzusunda beynəlxalq konfrans öz işini başa çatdırmışdır. Dünyanın 60-dan artıq ölkəsinin, siyasi dairələrinin, Avropa İttifaqının, BMT-nin və digər beynəlxalq qurumların nümayəndələrinin iştirak etdikləri tədbirdə “Soyqırım” məfhumu bu gün təcavüz aktları, ərazilərin ələ keçirilməsi və etnik təmizləmələrlə müşayiət olunan təcavüzkar separatizmin, ekstremizm və beynəlxalq terrorizm kimi qlobal hədələrin və güc tətbiqinin ən məkrli, düşünülmüş və qəddarlıqla həyata keçirilən forması kimi qəbul olunmuşdur.

Konfransda xüsusilə nəzərə çatdırılmışdır ki, Sudanda, Burundidə, İndoneziyada, Zimbabvedə, Çeçenistanda və Cənubi Qafqazda cərəyan edən regional münaqişələrin həllinin uzadılması bu bölgələrin etnik əhalisinə qarşı soyqırım və etnik təmizləmələrlə müşayiət oluna biləcək təhlükələrə zəmin yaradır.

İştirakçı dövlətlərin təmsilçiləri soyqırım və etnik təmizləmə aktlarına qarşı qlobal mübarizə aparan Haaqa Beynəlxalq Məhkəməsi və BMT Konvensiyalarının işinə yardımçı ola biləcək beynəlxalq strukturların sayını artırmaq təklifi ilə çıxış etmişlər. BMT-nin baş katibi Kofi Annanın “BMT yanında Soyqırım və Etnik Təmizləmələrə Qarşı Daimi Mübarizə Komitəsi”nin təsis olunması barədə təklifi bəyənilmişdir. Soyqırım və etnik təmizləmə cəhdlərinə qarşı beynəlxalq mübarizənin fəal mexanizmlərini işləyib hazırlamaq BMT-nin yeni daimi komitəsinin əsas vəzifələrindən biri olacaqdır.

SOYQIRIM VƏ ETNİK TƏMİZLƏMƏ AKTLARINA QARŞI BEYNƏLXALQ MÜBARİZƏ DİQQƏT MƏRKƏZİNDƏ OLMUŞDUR

MÜƏLLİFLƏ ƏLAQƏ

Bölmənin digər xəbərləri