“Spiegel”: Almanlar 2019-cu illə müqayisədə daha az tolerantdırlar
Berlin, 15 sentyabr, AZƏRTAC
Almaniya əhalisi beş il əvvəllə müqayisədə daha az tolerantdırlar.
AZƏRTAC “Spiegel” qəzetinə istinadla xəbər verir ki, bu, Robert Boş Fondu tərəfindən aparılan sorğunun nəticələrində əksini tapıb.
Respondentlərin cəmi 34 faizi dini müxtəlifliyi zənginlik kimi qiymətləndirib. Bu rəqəm etnik mənşə ilə bağlı suala cavabda 56 faiz təşkil edib. Halbuki, 2019-cu ildə keçirilmiş oxşar sorğuda bu göstəricilər müvafiq olaraq 44 və 73 faiz olub.
Müxtəlifliklə bağlı sorğu federal əyalətlər arasında fərqlərin olduğunu göstərib. Şlezviq-Holştayn və Şimali Reyn-Festfaliya əyalətlərinin sakinləri müxtəlifliyin qəbul edilməsinə görə 100 ballıq şkala üzrə 65 bal ilə ən yüksək göstəricini nümayiş etdiriblər. Onları 64 balla Zaarland və Hamburq izləyib.
Şərqi Almaniya əyalətlərində isə müxtəlifliyin daha az qəbul edildiyi müşahidə olunub. Aşağı Saksoniya, Bremen, Berlin, Bavariya və Raynland-Pfalts əyalətlərində 63, Hessen, Saksoniya-Anhalt, Brandenburq və Baden-Vürttemberq əyalətlərində 62, Türingiya və Saksoniyada 60, Meklenburq-Ön Pomeraniyada isə ən aşağı - 59 ballıq nəticə qeydə alınıb.
Araşdırmanın müəllifləri tolerantlığın azalmasının səbəbləri sırasında koronavirus pandemiyasını, müharibələri və iqtisadi geriləməni qeyd ediblər.
Berlin
Bölmənin digər xəbərləri
