STRASBURQDA XOCALI FACİƏSİNİN 17-Cİ İLDÖNÜMÜNƏ HƏSR OLUNMUŞ İZDİHAMLI MİTİNQ KEÇİRİLMİŞDİR
Paris, 1 mart ( AZƏRTAC ). Strasburqda fəaliyyət göstərən “Azərbaycan evi”, Azərbaycanla Mədəni Əlaqələr Cəmiyyəti, Fransadakı Azərbaycanlı Tələbələr Assosasiyası, Azərbaycan Kültür Cəmiyyəti və Miluz şəhərindəki Fransa-Azərbaycan Mədəniyyət Assosiasiyası fevaralın 28-də Strasburqun mərkəzindəki Kleber meydanında Xocalı soyqırımının 17-ci ildönümünə həsr olunmuş mitinq keçirmişlər.
Kaman ustası Habil Əliyevin səsləndirdiyi həzin musiqi sədəları altında başlayan mitinqdə şəhidlərimizin xatirəsi bir dəqiqəlik sükutla yad edilmişdir.
Azərbaycan həqiqətlərini və Xocalı faciəsini dünya ictimaiyyətinə çatdırmaq məqsədilə Heydər Əliyev Fondu tərəfindən çap edilmiş kitab və bröşürlardan, fotolardan, Azərbaycanın Avropa Şurası yanındakı Daimi Nümayəndəliyinin təqdim etdiyi müxtəlif əyani vasitələrdən ibarət sərgi təşkil edilmişdir. Yerli sakinlər, şəhərin qonaqları XX əsrin ən ağrılı tarixi məqəmlarını özündə əks etdirmiş sərgiyə maraqla tamaşa etmişlər.
Üzərində fransız və ingilis dillərində “Xocalıya ədalət”, “Köçəryan və Balayan axtarışda olan canilərdir”, “Ermənistanın işğal etdiyi Azərbaycan torpaqları tezilklə azad edilməlidir”, “Xocalı soyqırımı azərbaycanlıların soyqırımıdır”, “İşğaı olunmuş Azərbaycan ərazilərində mədəniyyət abidələrinin dağıdılmasına son qoyulsun”, “Biz onları heç vaxt bağışlamayacağıq” şüarlar yazılmış plakatların nümayiş etdirildiyi mitinqdə azərbaycanlı tələbə Elvin Abbasbəyli Xocalı soyqırımı ilə bağlı bəyənatı fransız dilində oxumuşdur.
“Azərbaycan evi”nin həmsədri Mustafa Alınca fransanın nüfuzlu “Le Monde” və “Humanite” qəzetlərinin 3 və 14 mart tarixli nömrələrində Xocalı faciəsindən bəhs etmiş materialları oxumuş, fevralın 25-dən 26-na keçən gecə erməni hərbi birləşmələrinin Sovet ordusunun 366-cı motorlu diviziyası ilə birlikdə Xocalıda törətdikləri qətliyamdan, ermənilərin nəinki Ermənistanda, işğal etdikləri Azərbaycanın ərazilərində belə etnik təmizləmə aparmasından danışmış, soyqırıma rəhbərlik etmiş Ermənistanın keçmiş və hazırki prezidentləri Pobert Köçaryan və Serj Sərkisyanın müharibə caniləri kimi cinayət məsuliyyətinə cəlb olunmadıqlarını təəssüf hissi ilə qeyd etmişdir. M. Alınca Azərbaycan həqiqətlərini dünya ictimaiyyətinə, beynəlxalq təşkilatlara çatdırmaq üçün diaspor təşkilatlarını sıx birləşməyə və daha geniş fəaliyyət göstərməyə çağırmış, Xocalı faciəsinə siyasi qiymət verilməsini tələb etmişdir.
Mitinqdə əlləri yüzlərlə azərbaycanlının qanına bulaşmış Robert Köçaryanın, Serj Sərkisyanın və Zori Balayanın beynəlxalq məhkəməyə verilməsi tələbləri səslənmişdir.
Xocalı soyqırımına siaysi qiymət verilməsi üçün BMT, Avropa İttifaqı, Avropa Şurası və Beynəlxalq Məhkəməyə yazılı müraciətlər olunması baradə qərar qəbul edilmişdir.
Mitinq zamanı Heydər Əliyev Fondu tərəfindən Azərbaycan həqiqətləri və Xocalı soyqırımınla bağlı buraxılmış broşür və digər vəsaitlər yeli sakinlərə və şəhərin qonaqlarına paylanmışdır.
Alzas regionunda gündəlik nəşr olunan “Alzasın son xəbərləri” və “Alzas” qəzetlərində Xocalı faciəsindən bəhs edən “Azərbaycan icması Xocalı soyqırımını yad edir” və “Azərbaycanlılar Xocalı faciəsinə görə sorğu tələb edirlər” başlıqlı materiallar və fotolar dərc edilmişdir.
Mitinqdən sonra Xocalı şəhidlərinin ruhuna ehsan verilmişdir.
Əsgər Əliyev,
AZƏRTAC-ın xüsusi müxbiri.
Paris
Bölmənin digər xəbərləri
