İQTİSADİYYAT
SU TƏCHİZATI VƏ KANALİZASİYA SİSTEMLƏRİ TƏMİR OLUNUR
Bu ayın ortalarında Azərbaycan şəhərlərinin su təchizatı və kanalizasiya sistemlərinin yenidən qurulmasının Almaniyanın KFVV bankı tərəfindən maliyyələşdirilən birinci mərhələsi başa çatacaqdır. Bankın ayırdığı 20 milyon dolların bir hissəsi təsərrüfat infrastrukturunun, o cümlədən İmişli rayonunda artezian quyularının, nasos stansiyalarının və su kəmərinin təmirinə və bərpasına sərf olunmuşdur.
Biznes -plana uyğun olaraq, bu rayonda bir neçə obyekti yaxın vaxtlarda yaradılacaq birgə müəssisənin ixtiyarına vermək nəzərdə tutulmuşdur. Müəssisədə Almaniya şirkətlərindən biri də iştirak edəcəkdir. KFVV bankı birgə müəssisənin işləyəcəyi on il ərzində Gəncədə və Şəkidə su təchizatı və kanalizasiya sistemlərinin təmirinə dair layihənin ikinci mərhələsi üçün daha 10 milyon avro ayırmaq fikrindədir.
Xatırladaq ki, Azərbaycan Respublikası ilə Almaniya arasında ikitərəfli iqtisadi əməkdaşlıq çərçivəsində AFR hökuməti indiyədək ölkəmizə təxminən 130 milyon avro ayırmışdır ki, onun da əsas hissəsi təsərrüfat infrastrukturu obyektlərinin bərpa edilməsi üçün nəzərdə tutulmuşdur.