Suverenliyin konstitusion-hüquqi anlayışı və dövlətin xarici siyasəti: Azərbaycan qlobal çağırışlar kontekstində VİDEO
Bakı, 13 may, AZƏRTAC
Azərbaycan Respublikasının Prezidenti yanında Dövlət İdarəçilik Akademiyasında “Suverenliyin konstitusion-hüquqi anlayışı və dövlətin xarici siyasəti: Azərbaycan qlobal çağırışlar kontekstində” mövzusunda beynəlxalq elmi-praktik konfrans keçirilib.
AZƏRTAC xəbər verir ki, Azərbaycanda “Konstitusiya və Suverenlik İli”nə həsr olunan konfransın keçirilməsində məqsəd suverenlik anlayışının hüquqi və siyasi kontekstlərdə dəyərləndirilməsi, eləcə də dövlətin müasir dövrdəki xarici siyasət prioritetləri ətrafında fikir mübadiləsi aparılması olub.
Konfransda yerli və xarici ekspertlər, tanınmış hüquqşünaslar, politoloqlar və beynəlxalq münasibətlər üzrə alimlər iştirak ediblər.
Açılış nitqi ilə Dövlət İdarəçilik Akademiyasının rektoru akademik Urxan Ələkbərov çıxış edərək bildirib ki, konfransda 9 ölkədən nümayəndələr əyani və onlayn formatda iştirak edirlər. Azərbaycanın 2023-cü ildə suverenliyini tam bərpa etdiyini vurğulayan rektor qeyd edib ki, Azərbaycanın iqtisadi inkişafı beynəlxalq təşkilatların hesabatlarında yer alır.
Daha sonra Dövlət İdarəçilik Akademiyasının Beynəlxalq münasibətlər və xarici siyasət kafedrasının müdiri hüquq elmləri doktoru, professor Namiq Əliyev “Konstitusiya, suverenlik və müasir mərhələdə Azərbaycanın xarici siyasətinin bəzi beynəlxalq-hüquqi aspektləri” mövzusunda çıxış edərək Azərbaycanın dövlət müstəqilliyi, ərazi bütövlüyü və beynəlxalq hüquqda tanınmış suverenlik prinsiplərinin tətbiqi üzrə aktual yanaşmaları elmi-praktik əsaslarla təhlil edib.
Suxumi Dövlət Universitetinin rektoru professor Zurab Khonelidze bildirib ki, dünyada baş verən hadisələr, transformasiyalar sivil cəmiyyətin davranışını tamamilə dəyişib: “Dünyagörüşü, dərin fəlsəfi intellektual arqumentlər insanlar və cəmiyyət arasında əsas dəyər daşıyıcısı olub. Azadlıq, ədalət və sevgi kimi insani dəyərlər uğurun əldə olunmasında mühüm rol oynayır. Bunun üçün universal model yoxdur, bu yol universitetdən keçir. Universitet elmin rəmzidir. İstənilən sosial uğuru bunsuz təsəvvür edə bilmərik”.
“Kafkassam” Strateji Araşdırmalar Mərkəzinin rəhbəri professor Hasan Oktay Azərbaycanın Qafqaz coğrafiyasında önəmli dövlət olduğunu qeyd edib və qısa müddətdə böyük inkişaf yolu keçdiyini xatırladıb: “Azərbaycan sülh sazişini Ermənistanla imzalamağa hazırlaşır. İranının və Gürcüstanın gələcəyi baxımından Azərbaycan önəmli ölkədir. Türküstan coğrafiyasında faydalı qazıntıların Azərbaycan üzərindən daşınması ilə bağlı deyilənlər onun sabitlik və təhlükəsizliyinin zəmanətidir”.
Rusiya Federasiyasının 1-ci dərəcəli dövlət müşaviri siyasi elmlər doktoru Tatyana Poloskova çıxışında beynəlxalq əlaqələrdə yeni düzən qurulmasından danışıb: “Beynəlxalq hüquqda suverenlik indiki vəziyyətdə əhəmiyyətlidir. Fərqli resurslar var. Ancaq xarici siyasət iqtisadi maraqlar üzərində qurulur. Beynəlxalq hüquq yüz illərlə qurulub və bəşəriyyət bu qaydalarla idarə olunur”.
Qazaxıstanın Beynəlxalq “Şərq-Qərb” Geopolitik Proqnozlaşdırma Mərkəzinin prezidenti, professor Karlığaş Nuğmanova isə qeyd edib ki, dünyada baş verən hadisələr bizdən təhlükələrə qarşı sistemli qiymətləndirmə tələb edir: “Bizim ölkələrimiz arasında əməkdaşlıq əlaqələri mövcuddur. Yaxın gələcəkdə bizim ölkələri ümumi tarix və geosiyasi sferada maraqlar birləşdirir”.
İsrailin İnformasiya Müharibələri Araşdırma İnstitutunun icraçı direktoru Yuriy Boçarov çıxışında qeyd edib ki, geosiyasi dinamika bir çox qlobal çağırışlardan formalaşır: “Bu, region ölkələrini beynəlxalq əlaqələrin yeni reallıqlarına uyğunlaşmağa məcbur edir. Bizim regionda hara getsək də, müzakirə etsək də hər yerdə ABŞ, Rusiya və Çin var, onlar ticari və diplomatik meydanda rəqabətdədirlər. Azərbaycan bu gün nəqliyyat dəhlizi rolu oynayır. Azərbaycanın güclü enerji ehtiyatları var. Hesab edirəm ki, Azərbaycanın yürütdüyü müstəqil iqtisadi siyasət bütün region ölkələrinin inkişafına təkan verəcək”.
“Qarabağ” Araşdırmalar mərkəzinin rəhbəri professor Elçin Əhmədov bildirib ki, Azərbaycanın milli maraqlara əsaslanan düşünülmüş siyasətinin əsası hələ Ümummilli Lider Heydər Əliyev hakimiyyətə gələndə qoyulub. Onun hakimiyyəti dövründə xarici siyasət strategiyasında ərazi bütövlüyünün bərpası məsələsi önə çəkilirdi. Prezident İlham Əliyevin hakimiyyəti dönəmində isə suverenliyimiz tam bərpa edildikdən sonra Azərbaycan beynəlxalq arenada mühüm rol oynamağa başlayıb”, - deyə o qeyd edib.
Bölmənin digər xəbərləri
