ELM VƏ TƏHSİL
Tarix Muzeyində Şuşa qalasının gümüş açarı saxlanılır
Bakı, 12 noyabr, AZƏRTAC
Milli Azərbaycan Tarixi Muzeyinin Silahlar və bayraqlar fondunda Şuşa qalasının gümüş açarı saxlanılır.
Muzeydən AZƏRTAC-a bildirilib ki, açarlar çar Rusiyasının Şuşanı işğalı zamanı qənimət kimi götürülüb, müxtəlif yollarla Azərbaycandan çıxarılıb və 1888-ci ildə Tiflisdə açılmış Qafqaz Hərb Tarixi Muzeyinə verilib. 1924-cü ildə dövlətçilik atributu sayılan bir neçə xanlığın bayraqları, Gəncə xanı Cavad xanın buncuğu, Qarabağ xanı İbrahimxəlil xanın şeşpəri və şəhər-qalaların açarları da Tarix Muzeyinə təhvil verilib.
Şuşa qalasının açarları gümüşdən hazırlanaraq qızılı, gümüşü saplarla toxunmuş qotazlarla işlənib. Muzeydə qorunan bu açarlar Şuşa şəhərinin tarixinin tədqiqi və təbliği baxımından əhəmiyyətlidir.