Telman Qahirədəki Amerika kollecinin nümunəvi şagirdlərindən biridir
Əmman, 31 yanvar (AZƏRTAC). Telman lap uşaqlıqdan hər şeyi öyrənmək həvəsi və təhsilə, qiraətə, məntiqi oyunlara çox böyük marağı ilə fərqlənirdi. Buna görə də artıq 5 yaşında ikən onu valideynləri Aqşin və Səbinənin uzunmüddətli xidməti ezamiyyətə göndərildikləri Misirdə onu “Cairo American College” məktəbinin hazırlıq sinfinə qəbul etdilər.
Valideynləri əmin idilər ki, övladları əla oxuyacaq və aktiv xarakterinə görə sinifdə birincilər sırasında olacaqdır. Belə də oldu. Hazırda kollecin 2-ci sinfində oxuyan 8 yaşlı Telman Mehdiyev məktəbin fəxridir - əlaçı və nümunəvi şagirdlərdən biridir, valideynlərinin ümidlərini və gözləntilərini doğruldur. Telmanın eksperiment və təcrübə aparmağa marağını hiss edən valideynlər onu “Maraqlı elm” dərnəyinə yazmışlar. Dərnəkdə o, səfərdə istifadə etmək üçün müxtəlif materiallardan faydalı qurğular yaratmağı öyrənmişdir. Məsələn, o, içində su olan qab, penoplast və adi mismarın köməyi ilə kompas, günəş enerjisini əks etdirmək üçün folqadan istifadə etməklə yemək qızdıran cihaz düzəldə, bir çox başqa ideyaları, maraqlı eksperimentləri həyata keçirə bilir. Bununla yanaşı Telman dərslərinin öhdəsindən yaxşı gəlir, qiraət etməyi çox sevir, xüsusən də elmi əsərlərə, ensiklopediyalara, planetlər, ulduzlar, heyvanlar aləmi haqqında kitablara maraq göstərir.
Balaca həmvətənimiz həm də hamının sevimlisidir, çünki çox ünsiyyətcil və xeyirxahdır ki, bu səbəbdən də məktəbdə müxtəlif millətlərdən olan çoxlu dostları vardır. Müəllimlər də onun çox pozitiv və mehriban uşaq olduğunu deyirlər.
Bütün oğlan uşaqları kimi idmanı sevir, futbol və başqa oyunlar oynayır, amma tennis və üzgüçülüklə 5 yaşından məşğul olur. Elə o yaşından Amerika kollecini təmsil edərək məktəblər arasında keçirilən yarışlarda daim iştirak edir.
Azyaşlı olduğuna baxmayaraq, valideynləri sayəsində Telman vətənpərvərlik və öz vətəninə böyük məhəbbət ruhunda böyüyür, öz milli mənsubiyyətini dərk edir və heç vaxt unutmur ki, o, azərbaycanlıdır və hamıdan yaxşı olmalıdır. Hər il Telman böyük fəxrlə Azərbaycanı təmsil edərək “International day” məktəb bayramında iştirak edir, milli geyimdə Azərbaycan rəqslərini təqdim edir. Bu beynəlxalq bayram çərçivəsində Amerika kollecində təhsil alan bütün millətlərin nümayəndələri və onların valideynləri tədbir iştirakçılarını öz xalqlarının mədəniyyəti, ənənələri, incəsənəti və mətbəxi ilə tanış edirlər.
Bir sözlə, Telman Mehdiyev istər təhsil, fəal həyat tərzi, yaxşı davranış, istərsə də Vətəninə məhəbbət baxımından bir çox yaşıdları üçün nümunədir.
Asya Hacızadə
AZƏRTAC-ın xüsusi müxbiri
Əmman
Bölmənin digər xəbərləri
