Azərbaycan Respublikası Dövlət Neft Şirkətindən (ARDNŞ)
AZƏRTAC-a bildirmişlər ki, Xəzərdəki “Günəşli” yatağında yeni quyuların qazılması və istismara verilməsi, həmçinin, aşağı və orta təzyiqli qazın yığılması hesabına 2007-ci ildə 500 milyondan 1 milyard kubmetrədək əlavə qaz hasilatı nəzərdə tutulur. Bu vəzifəni yerinə yetirmək üçün hazırda “Günəşli” yatağındakı platformalardan Neft daşlarındakı iriləşdirilmiş separasiya qurğusunadək yüksəktəzyiqli qaz kəməri çəkilir. Uzunluğu 22 kilometr olan kəmərin 13,5 kilometrlik hissəsini yeni çəkilən xətt təşkil edəcəkdir. Neft daşları Neft və Qaz Çıxarma İdarəsinin ərazisində qaz kəmərinin çəkilişi ilə məşğul olan “Süleyman Vəzirov” borudüzən gəmisi bir gündə 700 metr uzunluğunda sualtı boru xətti çəkərək rekord göstəriciyə nail olmuşdur.
Bu işlər tamamlanandan sonra kəmərlə sutkada 2 milyon kubmetr qaz nəql etmək mümkün olacaqdır. Kəmərin 5.500 metrlik hissəsi artıq çəkilmişdir. Eyni zamanda, Hövsandakı sahilboyu sahədə də 1.800 metrlik xətt qaynaq edilmişdir. Bu xətlər də kəmərə birləşdiriləcəkdir. Kəmərin, təxminən, 7.300 metrlik hissəsi artıq quraşdırılmışdır.
Kəmərdə tikinti və yenidənqurma işləri avqustin 20-dək başa çatdırılacaqdır.
