“Turizm ili” çərçivəsində Mingəçevirə infotur təşkil ediləcəkdir
Bakı, 28 iyul (AZƏRTAC). Prezident İlham Əliyevin “Azərbaycan Respublikasında 2011-ci ilin “Turizm ili” elan edilməsi ilə bağlı Tədbirlər Planının təsdiq olunması haqqında” 2011-ci il 20 iyul tarixli Sərəncamının müvafiq bəndlərinin icrası ilə əlaqədar Mədəniyyət və Turizm Nazirliyinin dəstəyi, “Millennium” turizm şirkətinin və “Kür” mehmanxanasının təşkilatçılığı ilə iyulun 30-31-də yerli turizm şirkətlərindən və kütləvi informasiya vasitələrinin nümayəndələrindən ibarət 40 nəfərlik heyət üçün Mingəçevir şəhərinə turizm üzrə infotur təşkil ediləcəkdir.
Mədəniyyət və Turizm Nazirliyindən AZƏRTAC-a bildirmişlər ki, tədbirin məqsədi infotur iştirakçılarına Mingəçevir şəhərinin turizm potensialını, mövcud infrаstrukturu, əsas turizm xidmətlərini nümayiş etdirməkdir.
İnfotur çərçivəsində avarçəkmə turizm marşrutunun təqdimatının keçirilməsi də nəzərdə tutulmuşdur.
Turizm şirkətləri və KİV nümayəndələri iki gün ərzində Mingəçevir şəhərindəki “Kür” Olimpiya Tədris-İdman Mərkəzi və mehmanxanalarla, mədəni-tarixi abidələrlə tanış olacaqlar.
Bölmənin digər xəbərləri
