Turizm ilində Göygöl rayonuna dincəlməyə gələnlərin sayı artmışdır
Göygöl, 16 iyul (AZƏRTAC). Göygöl rayonu turizmin inkişafı üçün geniş imkanlara malikdir.Sıx meşələri, buz bulaqları, zirvəsi həmişə qarla örtülən dağları, zəngin florası uzun illərdir ki, turistləri cəlb edir. Burada təbiətin gözəlliyi müasir tələblər səviyyəsində inşa olunan istirahət mərkəzləri ilə də vəhdət təşkil edir. Turistlərin daha çox marağına səbəb olan faktorlardan biri də Göygöl rayonunun tarixin müxtəlif dövrlərinə aid abidələridir.
Rayon mədəniyyət və turizm şöbəsinin müdiri Şərqiyyə Hümbətovanın verdiyi məlumata görə, ərazidə olan tarixi abidələrlə bağlı faktlar tam dəqiqləşdirildikdən sonra onların turist marşrutları hazırlanmış, bu sahədə çalışanlara ətraflı bilgi verilmiş və ayrıca bukletlər hazırlanmışdır. Həyata keçirilən bu tədbirlərin nəticəsidir ki, rayona dincəlməyə gələn turistlərin sayında artım müşahidə olunur. Keçən ildən fərqli olaraq, bu il rayonda istirahət yerlərinin də sayı xeyli artmışdır. Aşıqlı, Topalhəsənli, Yeni Zod və Üçbulaq kəndlərində yeni mərkəzlər yaradılmışdır. Bu kəndlərin Kiçik Qafqaz sıra dağlarının ətəyində yerləşməsi turistlərdə böyük maraq doğurur.
Şöbə müdirinin verdiyi məlumata görə, keçən il Göygöl rayonuna gələn turistlərin sayı 20 min nəfər olmuşdur. Turizm ilində isə bu rəqəmin iki dəfə artacağı gözlənilir.
Bölmənin digər xəbərləri
