“Turizm ili”nə ictimai dəstək proqramının icrasına başlanacaqdır
Bakı, 2 sentyabr (AZƏRTAC). Yaxın günlərdə Gənclər üçün Təhsil Mərkəzi (GTM) “Turizm ili”nə ictimai dəstək verilməsi məqsədilə yeni proqramın icrasına başlayacaqdır.
GTM-dən AZƏRTAC-a bildirmişlər ki, proqramın əsas məqsədi həm ölkəmizdə, həm də Avropanın müxtəlif təhsil ocaqları, gənclər mərkəzləri və mediasında Azərbaycanın turizm potensialının tanıdılmasına kömək etmək, gənclərimizin turizm təşəbbüslərinin artmasına şərait yaratmaqdır.
Proqramın əlaqələndiricisi Qabil Əliyevin verdiyi məlumata əsasən, bu proqramın reallaşdırılması üçün artıq bir neçə xarici ölkənin turizm təşkilatlarının iş təcrübəsi öyrənilmiş və ilkin əməkdaşlıq üçün razılıq əldə olunmuşdur.
İki il davam edəcək proqram çərçivəsində ölkəmizin turizm potensialını tanıdacaq internet portalının yaradılması, digər ölkələrin universitetlərində təqdimat mərasimlərinin və Azərbaycan günlərinin keçirilməsi, xarici mətbuatla işin təşkili, yerli turizm şirkətləri üçün idarəetmə təlimlərinin keçirilməsi və s. nəzərdə tutulur.
Bölmənin digər xəbərləri
