Türk politoloq: İqtisadi bağlantılar gücləndikcə Cənubi Qafqazda sabitlik üçün yeni imkanlar formalaşır
Bakı, 13 fevral, AZƏRTAC
ABŞ–Azərbaycan Strateji Tərəfdaşlıq Xartiyasının həyata keçirilməsi və “Tramp dəhlizi” kimi tanınan TRIPP nəqliyyat xəttinin istifadəyə verilməsi Cənubi Qafqazda iqtisadi inteqrasiyanı gücləndirmək və dayanıqlı sülh üçün əlverişli zəmin yaratmaq potensialına malikdir.
Bu fikirləri AZƏRTAC-a açıqlamasında türk siyasi şərhçi Umur Tuqay Yücel bildirib.
Onun sözlərinə görə, bu potensial regional münasibətlərin əsasən iqtisadi qarşılıqlı asılılıq üzərində formalaşmasına imkan yaradır. “ABŞ–Azərbaycan strateji tərəfdaşlığı Azərbaycanın enerji ixracatçısı mövqeyini möhkəmləndirməklə yanaşı, nəqliyyat, logistika, rəqəmsal infrastruktur və süni intellekt sahələrində qlobal sistemə inteqrasiyasını da sürətləndirir”.
Ekspert deyib ki, TRIPP-ın Azərbaycanın əsas hissəsi ilə Naxçıvan arasında maneəsiz nəqliyyat əlaqəsini təmin etməsi və regional ticarət marşrutlarını gücləndirməsi Cənubi Qafqazın geosiyasi rəqabət məkanı deyil, iqtisadi bağlantı mərkəzi kimi formalaşmasına imkan yaradacaq. İqtisadi əlaqələr artdıqca region ölkələrinin sabitliyə olan marağı da yüksəlir və Cənubi Qafqazın iqtisadi əlaqələndirmə mərkəzi kimi rolu artır.
“Bu proses Türkiyə üçün də xüsusi əhəmiyyət daşıyır. Çünki Orta Dəhliz strategiyası Asiya ilə Avropa arasında ticarətin təhlükəsiz və davamlı marşrutlar üzərindən həyata keçirilməsini nəzərdə tutur. Cənubi Qafqazda yeni tranzit xəttinin Orta Dəhlizlə inteqrasiyası Türkiyənin geoiqtisadi mövqeyini daha da möhkəmləndirərək logistik imkanlarını genişləndirəcək və enerji ilə ticarət axınlarında daha mərkəzi rol oynamasına şərait yaradacaq. Bu yanaşma, Türk dünyası ilə fiziki və iqtisadi əlaqələrin institusional əsasda möhkəmlənməsinə və daha konkret iqtisadi əməkdaşlıq modellərinin formalaşmasına xidmət edəcək”, - deyə politoloq bildirib.
Umur Tuqay Yücelin sözlərinə görə, iqtisadi təşəbbüslərin davamlı nəticə verməsi üçün siyasi dialoq və qarşılıqlı etimad mühitinin qorunması vacibdir. O qeyd edib ki, iqtisadi inteqrasiya ilə siyasi uzlaşma paralel şəkildə inkişaf etdikdə bu layihələr daha dayanıqlı xarakter ala bilər.
Şərhçi sonda vurğulayıb ki, ABŞ-Azərbaycan Strateji Tərəfdaşlıq Xartiyası və TRIPP layihəsinin Orta Dəhliz strategiyası çərçivəsində həyata keçirilməsi Cənubi Qafqazda iqtisadi inteqrasiyanın güclənməsinə və regionda uzunmüddətli əməkdaşlıq mühitinin formalaşmasına töhfə verəcək: “Prosesin davamlı sülh modelinə çevrilməsi üçün iqtisadi maraqlar siyasi dialoqla dəstəklənməli və regionda heç bir tərəfin kənarda qalmadığı balanslı yanaşma qorunmalıdır”, - deyə şərhçi əlavə edib.
Bölmənin digər xəbərləri
